Қазақстан Республикасының ауыл шаруашылығы мен агроөнеркәсіптік кешенінің дамуы – мемлекеттің басты басымдықтарының бірі. Ел экономикасының маңызды саласы ретінде агроөнеркәсіп кешеніне бөлінетін қолдау жыл сайын артып келеді. Осы бағытта мемлекет түрлі бағдарламалар мен шаралар қабылдап, ауыл шаруашылығын дамытуға, агроөнеркәсіптік кешенді қолдауға ерекше назар аударып отыр. Шығыс Қазақстан облысы да бұл саладағы дамуға елеулі үлес қосып, еліміздегі агроөнеркәсіптік кешенді дамытудағы мемлекеттік қолдаудың аясында өз жетістіктерін көрсетуге мүмкіндік алды. Бұл жолда «Кең дала 2» бағдарламасы маңызды рөл атқарды,- деп хабарлайды Altainews.kz тілшісі.

2024 жылы Шығыс Қазақстан облысында ауыл шаруашылығы мен агроөнеркәсіптік кешен субъектілеріне көктемгі егіс және егін жинау жұмыстарын жүргізу үшін жеңілдікпен қысқа мерзімге несие беру мақсатында «Кең дала 2» бағдарламасы жүзеге асырылды. Аталмыш бағдарлама биылғы жылы аймақтың агроөнеркәсіп секторына қосымша қолдау көрсету үшін 10 миллиард теңге көлемінде қаражат бөлінуімен айрықша ерекшеленеді. Бұл қаражат көктемгі егіс және егін жинау науқандарында айналым қаражатын толықтыру үшін және ауыл шаруашылығы саласында тұрақты өсімді қамтамасыз ету үшін маңызды рөл атқарды.

«Кең дала 2» бағдарламасын іске асыру Шығыс Қазақстан облысындағы агроөнеркәсіптік секторға көмек көрсету бағытындағы маңызды қадам болып табылады. Биыл облыста осы бағдарламаның толықтай игерілуі үшін барлық қажетті шаралар қабылданды. Бұл бағдарламаны жүзеге асыру «Ертіс» әлеуметтік-кәсіпкерлік корпорациясы» АҚ-на жүктелген болатын. Агроөнеркәсіп саласына науқан кезінде ауадай қажет көмек түрі болып табылатын бұл бағдарламаны іске асыруда «Ертіс» ӘКК мен «Аграрлық несие корпорациясы» АҚ арасында негіздемелік келісім жасалған болатын.

Сонымен қатар, 10 миллиард теңге көлеміндегі несие қаражатын бөлу кезінде өңірдің агроөнеркәсіпшілеріне қосымша қолдау көрсету үшін «ДАМУ» кәсіпкерлікті дамыту қоры» АҚ-ның портфельдік кепілдік беруі маңызды рөл атқарды. Бұл іс-шара қарыз алушыларға қарыз сомасының 85%-на дейін кепілдік ресімдеуге мүмкіндік беріп, кәсіпкерлердің несие алу процесін жеңілдетті. Осылайша, бағдарламаға қатысушы кәсіпкерлер мен агроөнеркәсіптік субъектілер тиімді шарттармен қаржылық қолдау алды.

«Кең дала 2» бағдарламасының сәтті іске асуы үшін басты факторлардың бірі – ақпараттандыру жұмыстарының тиімділігі болып табылады. Ауыл шаруашылығы тауарларын өндірушілер мен аудан әкімдіктеріне бағдарлама туралы толық мәлімет берілді. Бағдарлама шарттары мен талаптары түсіндірілген хаттар жолданып, ауыл шаруашылығы саласындағы кәсіпкерлерге осы бағдарламаның мүмкіндіктері туралы ақпарат ресми сайттар мен әлеуметтік желілерде кеңінен жарияланды.

Дидар Мажиринов, «Ертіс» ӘКК» АҚ мемлекеттік бағдарламаларды жүзеге асыру департаментінің директоры, атап өткендей, «Ісін дөңгелетемін деген азаматтар мен компаниялар кез келген мемлекеттік қолдау бойынша толық ақпараттан хабардар болуы аса маңызды». Бұл ақпараттық қолдау ауыл шаруашылығы секторындағы кәсіпкерлердің бағдарламаға қатысуына, сондай-ақ тиімді шарттармен несиелер алуға мүмкіндік берді.

2024 жылы бөлінген 10 миллиард теңге толықтай игеріліп, негізгі қаражат астық жинау бағытындағы жұмыстарға жұмсалды. Несиенің басым бөлігі «ДАМУ» қоры тарапынан 7 миллиард теңгеден астам сомаға портфельдік кепілдіктер берілген несиелерді қамтиды. Мұның нәтижесінде ауыл шаруашылығы өндірушілеріне көктемгі егіс жұмыстарын тиімді жүргізуге және егін жинау науқанына дайындалуға мүмкіндік берілді.

Бағдарламаның басты ерекшелігі – жеңілдікпен берілген несиенің қысқа мерзімде қайтарылуы. Аталмыш бағдарлама бойынша алынған несие көктемгі егіс және күзгі егін жинау жұмыстарын жүргізу үшін қажет айналым қаражатын толықтыру мақсатында ұсынылды. Несие қайтарылуы келер жылдың көктеміне дейін жоспарланған, бұл өз кезегінде агроөнеркәсіптік сектордағы жұмысты тұрақты етіп, саланың дамуына ықпал етеді.

Агроөнеркәсіптік кешен – Қазақстан экономикасының негізі болып табылатын салалардың бірі. Елдегі азық-түлік қауіпсіздігін қамтамасыз ету, ауыл шаруашылығы өнімдерінің экспортын арттыру, ауылдық жерлерде жұмыс орындарын көбейту сияқты стратегиялық мақсаттарға қол жеткізу үшін агроөнеркәсіпті қолдау – мемлекеттің басты басымдығы болып саналады. Бұл салаға көрсетілген қолдау экономикалық тұрақтылықты қамтамасыз етуге, халықтың әл-ауқатын арттыруға, ауылдарда өмір сүру сапасын жақсартуға бағытталған.

Шығыс Қазақстан облысы бұл бағытта елеулі жетістіктерге жетіп отыр. Мемлекеттік бағдарламалар мен қолдау шаралары ауыл шаруашылығы секторын дамытуда айтарлықтай әсер етті. «Кең дала 2» бағдарламасы сияқты жобалар агроөнеркәсіптік кешеннің дамуына серпін беріп, өңірдің ауыл шаруашылығы тауарларын өндірушілеріне қолдау көрсетудің маңызды құралына айналды.

Шығыс Қазақстан облысында іске асырылған «Кең дала 2» бағдарламасы агроөнеркәсіптік кешенді дамытудағы маңызды қадам болып табылады. Бұл бағдарлама облыстың ауыл шаруашылығы саласын тұрақты дамытуды қамтамасыз етті. Мемлекет тарапынан көрсетілетін қолдау ауыл шаруашылығы кәсіпорындарының бәсекеге қабілеттілігін арттырып, аймақтық экономиканың дамуында оң нәтиже берді. Сонымен қатар, мемлекеттік бағдарламалардың қолдауы ауыл шаруашылығын қолжетімді несиелермен қамтамасыз етіп, кәсіпкерлерге қажетті құрал-жабдықтар мен ресурстарды алуға мүмкіндік берді. Бұл бағыттағы жұмыстар жалғасып, ауыл шаруашылығын дамытуға бағытталған жаңа бағдарламалар мен жобалар жүзеге асырылуда.