Ауылдарды абаттандыру – жергілікті тұрғындардың өмір сапасын арттырудың, сондай-ақ өңірлердің инфрақұрылымын жақсартудың маңызды бағыты. Бұл саладағы жұмыстар жыл сайын кеңейіп, жаңа жобалар жүзеге асырылуда. Былтырғы жылы ғана аудан көлемінде 149,0 миллион теңге көлемінде қаржы бөлініп, 25 жоба жүзеге асырылды, деп хабарлайды Altainews.kz тілшісі.

Оның 23-і бюджеттен қаржыландырылса, 2 жоба бюджеттен тыс қаражат есебінен іске асырылды. Бұл жобалар ауылдардың жалпы көрінісін жақсартуға, тұрғындардың бос уақытын тиімді өткізуіне және олардың тұрмыстық қажеттіліктерін қанағаттандыруға бағытталды.

Былтырғы жылы аудан көлемінде 5 балалар ойын алаңы, 6 шағын футбол алаңы және 2 стритворкаут алаңы салынды. Бұл нысандар тек аудан орталығында ғана емес, шалғайдағы ауылдарды да қамтыды. 2024 жылы осы жұмыстар аясында тағы 19 балалар ойын алаңы, 7 шағын футбол алаңы және 3 стритворкаут алаңы салынды. Әсіресе шекаралық шалғай ауылдар – Жалаңаш, Қамысты, Асусай, Жаңаталап, Ахметбұлақ, сондай-ақ тұрғындар саны аз Қарой, Жалғызтал, Сарыөлең және Қазақстан ауылдарына ерекше көңіл бөлінді. Бұл ауылдардағы жаңа нысандар балалар мен жастардың бос уақытын тиімді өткізуіне үлкен мүмкіндік беріп отыр.

Барлық ауылдарда ағаш көшеттерін отырғызу жұмыстары жүйелі түрде жүргізілді. Бұл бастама ауылдардың экологиялық жағдайын жақсартуға ғана емес, сондай-ақ олардың көркін арттыруға да ықпал етті. Биыл аудан бойынша жалпы абаттандыру және көгалдандыру жұмыстарына 500,0 миллион теңгеге жуық қаражат бөлінді. Бұл қаражат есебінен ауыл көшелеріне ағаштар отырғызылып, жасыл желектерді күтіп-баптау жұмыстары атқарылды.

Аудан орталығы Ақжар ауылы – бүкіл ауданның айнасы саналады. Сондықтан оның абаттандыру жұмыстарына ерекше көңіл бөлінуде. Жамбыл көшесінің бойындағы аллеяны абаттандыру жұмыстарына 235,7 миллион теңге бөлінді. Сонымен қатар, орталық саябақты жөндеу жұмыстары белсенді жүргізілуде. Бұл жұмыстар ауыл тұрғындарының демалыс уақытын жайлы әрі тиімді өткізуіне жағдай жасайды.

Жамбыл көшесінің бойындағы көппәтерлі үйлердің аулалары да назардан тыс қалған жоқ. Мұнда аулаларды абаттандыру жұмыстары жүргізіліп, балаларға арналған ойын алаңдары мен шағын футбол алаңдары салынды. Сондай-ақ ауылдың ішкі жолдарындағы барлық жол белгілері жаңартылып, Байжігіт пен Жамбыл көшелерінің қиылысына жаңа бағдаршам орнатылды. Бұл тұрғындардың қауіпсіздігін қамтамасыз етуге бағытталған маңызды қадам болды.

Ақжар ауылының басты көшелері – Байжігіт, Қабанбай, Жамбыл көшелерінің бойына жаяу жүргіншілерге арналған тротуарлар салынды. Бұл ауыл тұрғындарының қозғалысын жеңілдетіп, жаяу жүргіншілер үшін қауіпсіз орта қалыптастырды. Сонымен қатар, Байжігіт пен Жамбыл көшелерінің қиылысындағы көппәтерлі үйлердің шатырларына жөндеу жұмыстары жүргізілді. Бұл жұмыстар тұрғын үйлердің ұзақ мерзімді пайдалануға жарамдылығын арттырып, олардың қауіпсіздігін қамтамасыз етті.

Абаттандыру – тек қана инфрақұрылымды дамыту емес, ол тұрғындардың өмір сүру сапасын жақсартудың маңызды құралы. Ауылдарда балалар ойын алаңдары мен спорттық нысандардың салынуы, көшелердің көгалдандырылуы мен жөндеу жұмыстары тұрғындарға жайлы және қауіпсіз орта қалыптастыруға ықпал етеді. Әсіресе шалғайдағы ауылдарға ерекше көңіл бөлінуі – мемлекеттің әрбір тұрғынына деген қамқорлығының айқын көрінісі.

Алдағы жылдары да аудан басшылығы абаттандыру мен көгалдандыру жұмыстарын жалғастыруды жоспарлап отыр. Бұл бағыттағы жұмыстар тек ауыл тұрғындары үшін ғана емес, сонымен қатар ауданның жалпы дамуы үшін де маңызды рөл атқарады.