Жаңа жыл қарсаңында Күршім ауданына жұмыс сапарымен барған Шығыс Қазақстан облысының әкімі Ермек Көшербаев жергілікті халықпен кездесуінде өңірдің әлеуметтік-экономикалық даму көрсеткіштеріне тоқталды. Облыс әкімі көпшілік алдында өткен жылды қорытындылап, өңір тұрғындары үшін елеулі қоғамдық-саяси оқиғаларға тоқталып өтті, деп хабарлайды Altainews.kz тілшісі. 

Жиында Ермек Беделбайұлы жергілікті тұрғындардың өміріне елеулі өзгерістер енгізген ерекше маңызға ие қоғамдық-саяси  оқиғаларды атап өтті. Соның арасында өңір басшысы 2024 жылы 6 қазанда өткен АЭС құрылысы бойынша халықтың 73%-ы қолдап дауыс беру нәтижесін, сонымен қоса өңірдің даму қарқынына жаңа серпін беретін Бұқтырма көпірінің ашылуына  тоқталды. 

Осылайша, Бұқтырма суқоймасы арқылы өтетін жаңа көпір мен Қытаймен шекарадағы “Майқапшағай”, Ресеймен шекарадағы “Уба” өткізу пунктін қоса алғанда, өңірде қуатты, көлік-логистикалық хаб қалыптасып келеді. Бұл ретте өңір басшысы көпір маңайындағы жол мәселесіне назар аудару керектігін тілге тиек етті. Ермек Беделбайұлы бұған қоса жолдың шет маңында жұмыс істейтін бекеттерді іске қосу қажеттілігіне тоқталды. Яғни аудан кәсіпкерлеріне ауданға келген жолаушыларды тамақтандыру жағын қарастырып, санитарлық-гигиеналық тораптарды салу жұмыстарын бастауды тапсырды. Аймақ басшысы бұл жұмыстарды жүзеге асыру кезінде ең алдымен көпшілікті тәртіпке, тазалыққа шақырудың маңыздылығын алға тартты.

Арайлым Орсаринова 
Фото: Нелли Петенева