Риддер қаласында Достық үйінің 20 жылдық мерейтойына орай ұйымдастырылған дөңгелек үстелге мәдени орталықтар мен этнобірлестіктердің өкілдері, қаланың қоғамдық белсенділері жиналды. Олар еліміздегі бейбіт өмірдің кепілі болған осы шаңырақтың тарихи маңызы мен жетістіктері жайлы ой бөлісті, деп хабарлайды Altainews.kz тілшісі.

Риддерліктерді айтулы мерекемен құттықтаған облыстық Достық үйі – қоғамдық келісім орталығының директоры Эльдар Төлеубеков өз сөзінде бұл мекеменің елдегі татулық пен бірлікті нығайтудағы рөліне тоқталды.

Риддер қаласы әкімінің орынбасары Қаныбек Төлеуханов биылғы жылдың еліміз үшін маңызды оқиғаларға толы екенін атап өтті.

Қаладағы Достық үйінің директоры Миргүл Конуспаева биыл мекеменің қызметін жандандыруға қомақты қаражат бөлінгенін жеткізді.

Достық үйінде мемлекеттік тілді қолдау, жастар ұйымдарын дамыту және мәдениетаралық диалогты нығайту бағытында көптеген іс-шаралар өткізіліп келеді. Бұл тек мәдениетті дамыту ғана емес, сонымен қатар еліміздің бірлігі мен татулығын нығайтуға қосылған қомақты үлес. Осы игі бастамаларды қолдағаны үшін қалалық билік органдарына алғыс білдірген Эльдар Төлеубеков бұл жұмыстардың елдің мәдени және рухани дамуына үлкен әсер ететінін айтты.

Мерекелік шара барысында этнобірлестіктер өкілдерінің қолөнер бұйымдары көрмеге қойылып, кеш соңы мәдени орталықтар ұжымдарының мерекелік концертімен аяқталды.

Фото: Нелли Петенева

Видео: Ермек Жиенбеков