Елімізде балалардың қайда жүргенін қадағалауға арналған жүйе іске қосылмақ. Бұл туралы Қазақстан Ішкі істер министрлігінің ресми өкілі Нұрділдә Ораз айтты, деп хабарлайды Алтайньюс тілшісі. 

- Министрлік биыл іске асыратын пилоттық жобаларды атап өткім келеді. Ол баланың орналасқан жерін бақылауға мүмкіндік беретін «Мені тап» желісі, - деді Ораз брифингте.

"Мені тап" — Bluetooth желісінде жұмыс істеп, трекерлерді бақылайтын мобильді қосымша.

- Қосымша ата-аналардың смартфондарына орнатылады, ал трекерлерді баланың киіміне немесе мектеп сөмкелеріне орнатып қоюға болады. Егер ата-ана баламен байланыса алмаған жағдайда мобильді қосымшаны іске қосып, Bluetooth арқылы трекерді іздей алады, - деп қоса кетті Нұрділдә Ораз. 

Сонымен қатар ол  жүйенің жедел басқару орталығымен интеграцияланатынын, яғни баланы іздеген жағдайда сигнал автоматты түрде полицияға түсетінін атап өтті.

ІІМ жоспарланған басқа жобалар арасында:
* жедел шақыру құрылғысы - "SOS батырмасы". Оны басқан кезде құқық бұзушылық туралы хабарлама жіберуге немесе полициядан көмек сұрауға болады;
* 102 мобильді қосымшасы. Оның көмегімен құқық бұзушылық туралы хабарлауға болады. Сонымен қатар өтінішті тек телефон байланысы арқылы ғана емес мессенджерлер мен әлеуметтік желілер арқылы да бере алады.