Өскемен қаласында ауыр атлетикадан қала біріншілігі өтті. Тәуелсіздік күніне орай ұйымдастырылған ашық чемпионат «Олимпиец» олимпиадалық резервтің облыстық мамандандырылған балалар мен жасөспірімдер спорт мектебінде өтті, деп хабарлайды Altainews.kz тілшісі.

Аталмыш жарыс – өңірдегі ауыр атлетика спортын дамытуға бағытталған дәстүрлі спорттық іс-шаралардың бірі. Ұйымдастырушылардың айтуынша, бұл форматтағы чемпионат жыл сайын бірнеше рет өткізіліп, әр жолы еліміздегі маңызды мерекелік даталарға арналады. Биылғы сайыс Қазақстан Республикасының Тәуелсіздік күніне орайластырылды.
Чемпионаттың «ашық» деп аталуы да бекер емес. Бұл жарысқа Шығыс Қазақстан облысының барлық аудандарынан бөлек, көршілес Абай облысынан келген спортшылар да қатысуға мүмкіндік алды. Жас ерекшелігіне шектеу қойылмайды, тек әр команда салмақ дәрежелері мен қатысушылар саны жөнінде алдын ала мәлімет береді.

Чемпионаттың ашылу салтанаты Қазақстан Республикасының Мемлекеттік Әнұранымен басталды. Ашылу рәсімінде сөз алған 2016 жылғы Рио-де-Жанейро Олимпиадасының қола жүлдегері, жерлесіміз Денис Уланов жарысқа қатысушыларды Тәуелсіздік күнімен құттықтап, жас спортшыларға сәттілік тіледі.

Жарысқа Алтай, Тарбағатай аудандарынан, сондай-ақ Курчатов пен Өскемен қалаларынан шамамен 60 спортшы қатысып отыр. Чемпионат шымылдығын ауыр атлетикамен айналысатын қыздар ашты. Бұл – өңірде әйелдер арасындағы ауыр атлетиканың да біртіндеп дамып келе жатқанын көрсетеді.

Жарыс қорытындысы мен жеңімпаздар тізімі сайыс аяқталғаннан кейін жарияланатын болады.