Шығыс Қазақстан облысының әкімі Нұрымбет Сақтағанов халықаралық және республикалық додаларда ел намысын абыроймен қорғаған спортшыларды, сондай-ақ өскелең ұрпақты жеңіс жолына жетелеп жүрген жаттықтырушыларды салтанатты түрде марапаттады, деп хабарлайды Altainews.kz тілшісі.

Бүгінгі салтанатты шара тек құрмет көрсету емес, Шығыс Қазақстан спортының биік мәртебесін, ел спортына қосқан өлшеусіз үлесін танытқан тағылымды рәсім болды. Өңір спортшыларының әрбір жеңісі – бір өңірдің емес, тұтас елдің абыройына айналған алтын арқау. Көптүрлі спорт саласының өкілдері бас қосқан шара облыс спортының кең тынысын, өскелең әлеуетін паш етті.

Шығыстың спорт әлеміндегі даңқты жолы бүгінгі құрмет иелерімен толыға түсті. Халықаралық ареналарда топ жарған өрендер туған жердің, Қазақстанның айбынын асырған нағыз жұлдыздарға айналды.

Пара үстелді теннисте шеберлігімен көзге түскен Анна Мазаева, Ардақ Нұрмагамбетов, Вячеслав Эрбес және Екатерина Федоренко VII Спартакиадада жүлдегер атанып, өз табандылықтары арқылы өңір спортына үлкен серпін қосты. Ал дәл осы спорт түрінде алтыннан алқа таққан Алена Кутявина Шығыс бойжеткендерінің қайсарлығы мен шеберлігін тағы бір мәрте дәлелдей түсті.

Гір спортындағы ардагер Мухамедолла Ағзамовтың әлем чемпионатында жеңісі төзім мен қайсарлықтың, ерік пен қажырдың мерейіне айналды. Ал жас теннисшілер Нұрдәулет Азаматұлы, Әліби Шоманов және Рауанұлы Рамазан халықаралық турнирлер мен Президент кубоктарында топ жарып, қазақ үстел теннисінің жаңа толқыны қалыптасып келе жатқанын айқын көрсетті.

АҚШ-тың Миннесота штатында өткен дүбірлі додада керлингтен күміс жүлде иеленген Ангелина Пеняева, сондай-ақ Бахрейнде өткен жасөспірімдер арасындағы Азия ойындарында джиу-джитсудан ел намысын абыроймен қорғап, жүлдегер атанған Амина Жұмабекова – Шығыс Қазақстан спортшыларының халықаралық аренадағы беделі жылдан-жылға артып, өңірдің әлемдік спорт картасындағы орнын бұрынғыдан да айшықтап келе жатқанын көрсетеді.

Зілтеміршілердің жас буыны да назардан тыс қалмады: Софья Шалгина Азия чемпионатында күміс жүлде иеленсе, грек-рим күресінде Ерасыл Мамырбеков Вьетнам төрінде Азия чемпионы атанып, ел намысын асқақтатты.

«Азия балалары» халықаралық ойындарында жүзуден алтын алған Тайисия Короткова, Азия чемпионаттарында биік шыңға көтерілген байдарка мен каноэ шеберлері Маргарита Торлопова, Валентина Роговская, Сұлтан Шарапиев, Александр Куликов, Владислав Рябко, Виктория Квашнина, Анастасия Носкова, Иманғали Мәмбетовтың жетістіктері су спортының да Шығыста ерекше қарқынмен дамып келе жатқанын айғақтайды.

Хоккей алаңында шығыс қырандары талай белесті бағындырды. Әйелдер құрамасының өкілдері Вероника Агеева, Полина Говтва, Катрин Мескини, Мунира Саятқызы, Дильназ Саяхатқызы, Полина Яковлева, София Зубкова, Анна Пяткова, Златоцвета Феоктистова Азия ойындарында күміс алса, ерлер құрамасының намысын қорғаған Владимир Гребенщиков пен Степан Александров алтын жүлдеге қол жеткізді. Бұл нәтижелер – берік мектептің, мықты жаттығу жүйесінің жемісі.

Дәстүрлі садақ атуда ұлттық рухты асқақтатқан Ажар Төлеуқанова мен әлем кубогында алтыннан алқа таққан Аяш Кабдоллаева, сондай-ақ кикбоксинг аренасында қарсыласын қапыда қалдырып, әлемдік додаларда жеңіс тұғырына көтерілген Мақсат Ерланұлы мен Ернұр Қайырбеков – Шығыс Қазақстан спортының қаншалықты кең тынысты, сан қырлы әрі әлеуеті зор екенін айқын дәлелдеді.

Экстремалды күш спорттарында Темірлан Кенжехановтың әлемдік аренаны мойындатып, дүниежүзілік чемпионатта топ жаруы, әрі Найробиде өткен әлем біріншілігінде Батырхан Төлеуғалидің таеквондодан жеңіс тұғырының ең биігіне көтерілуі шығыстық жас буынның бойындағы тектілік, өр мінез бен қайсар қуаттың айқын айғағына айналды.

Сурдлимпия ойындарында биіктікке секіруден өзгелерден оқ бойы озып, жеңіс тұғырынан көрінген Фаина Меирманованың жетістігі Шығыс Қазақстан спорты, бүкіл ел үшін ерекше мақтаныш. Спортшының бұл табысы – мүмкіндіктің шексіз екенін, жүректе қуат пен сенім болса, кез келген биікті бағындыруға болатынын ұқтырған ұлағатты үлгі. Фаина Меирманованың есімі енді тек спорт тарихында ғана емес, талай жасқа жігер сыйлайтын символ ретінде қалары сөзсіз.

Әрбір чемпионның соңында оны үнсіз қолдап, шыңға жетелейтін ұстаз тұрады. Бүгінгі марапатта Федоренко Мария Михайловна бастаған хоккей бапкерлері, Ержан Шегенов, Мерхат Болатханов, Богдан Весельский сынды жаттықтырушылардың есімдері аталып, олардың еңбегі лайықты бағасын алды. Бұл марапат ұстаздарға тағзым, олардың өлшеусіз еңбегіне деген құрмет ретінде айшықталды. 

Жалғас Сақадиев
Махаббат Ахметжанова