Облыс орталығында жаңа балабақша ашылды. «Азамат AS -3»  деп аталатын мектепке дейінгі білім беру мекемесі 240 орынға шақталған, деп хабарлайды Altainews.kz тілшісі.

Ғарыш көшесі, 6/3 мекенжайында орналасқан балабақшада барлығы 12 топ болады. Төрт топта ерекше қажеттілігі бар балалар тәрбиеленетінін айта кеткен жөн.

Кешенді жөндеу жүргізілген, қажетті құрал-жабдықтармен қамтылған, түрлі түске боялған ғимаратты аралап көрген ата-аналар дән риза. Ал шуақты мереке күні онысыз да мәз-мейрам болып жүрген бүлдіршіндердіңи қуанышында шек жоқ.

Тұрғындарының саны жыл санап еселеп өсіп келе жатқан Өскемен үшін де бұл айтулы оқиға. Мәселен, биыл облыс орталығында 1 600  түлек оқуды аяқтаса, 6 200 бүлдіршін жаңа оқу жылында мектеп табалдырығын аттайды.

«Азамат AS -3»  балабақшасының ұжымы 3 маусымнан бастап жұмысқа кіріседі.

Айта кетейік, бүгінде өңірде 205 балабақша бар. Үш жастан бес жасқа дейінгі балалар мектепке дейінгі біліммен толық қамтылған. Екі жастан үш жасқа дейінгі мыңнан астам бала әзірше кезекте тұр.