Өскеменде үстел теннисінен тағы бір байрақты бәсеке мәресіне жетті, деп хабарлайды Altainews.kz тілшісі.

Қаладағы Үстел теннисі орталығында өткен республикалық жарысқа 2007 жылы туған және одан кіші жастағы спортшылар қатысты. Еліміздің түпкір-түпкірінен жиналған жас теннисшілер арасындағы бәсеке бір аптаға созылды.

Облыстық денешынықтыру және спорт басқармасынан хабарлағандай, кіл мықтылар сайысында шығысқазақстандық спортшылар ауыз толтырып айтарлықтай нәтижеге қол жеткізді. Дәлірек айтсақ, тартысты бәсекеде Шығыс Қазақстан облысының құрамасы жалпыкомандалық үшінші орынды жеңіп алып, ел чемпионатының қола медальдарына ие болды.

Енді дүбірлі додада облысымыздың намысын абыроймен қорғап, жүлде еншілеген жерлестерімізді атап өтсек, олар:  Нұрсая Нұрман, Еркежан Байтікенова, Айша Әсет, София Кальтенбергер, Мария Данилова, Арнұр Оралханов, Самат Төлебаев, Әліби Шоманов, Нұрбол Тоқтамыс пен Дінасыл Сайлауханов.

Нұржан Кенжеұлы

Фото: ШҚО денешынықтыру және спорт басқармасы