Шығыс Қазақстан облысында Сыбайлас жемқорлыққа қарсы қызмет, облыстық прокуратура, тауарлар мен көрсетілетін қызметтердің сапасын бақылау департаменті, «Шығыс – адалдық алаңы» жобалық кеңсесі және арнайы мониторингтік топ ақпараттық-насихаттау штабы өкілдерімен бірлесіп бірқатар дәріханаларды аралап, дәрі-дәрмек мөлшері мен олардың бағасына күнделікті мониторинг жүргізуде, деп хабарлайды Алтайньюс тілшісі.

Мұндағы басты мақсат – дәрі-дәрмек тапшылығын болдырмау және медициналық препараттардың бағасын негізсіз өсіруге жол бермеу. Аталмыш іс-шара аудандарда да жүзеге асып жатқанын айта кету керек. Мамандар күнделікті дәріханаларды тексеріп ғана қоймай,  тұрғындардың ұсыныс-тілектерін де «түрте» жүреді. Түйіткілді мәселелер тиісті органдарға жолданады.

Тексеруші топ күніне онға жуық нысанға барып, карантин талаптарының сақталуы мен ем-дом препараттар қорын тексереді. Топ мүшелерінің айтуынша, тұрғындар кейбір нысандарда дәрі-дәрмек қымбат екенін айтып шағымданған. Сонымен қатар дәрі-дәрмек сатып алу кезінде чек берілмейтіндігі туралы да сөз қозғалған көрінеді.

Айта кетейік, тұрғындар дәрі-дәрмек бағасын «dariKZ» мобильді қосымшасы арқылы бақылай алады.  Баға шекті мөлшермен сәйкес келмеген жағдайда тауардың түбіртегін алып, заң жүзінде арыздануға болады. Сондай-ақ арыз-шағымды аудио немесе бейнежазба арқылы 8702 000 24 94 және  8775 306 78 50 WhatsApp нөмірлеріне дәріхана атауын көрсете отырып жолдауға болады.