Өскемендегі Ертіс көпірінің КШТ ауданына қарай бағыттағы шеткі қатары бетон қоршаумен жабылды, деп хабарлайды Altaynews тілшісі.

Бұл көпір үстіндегі көлік қозғалысында қауіпті жағдай тудырмау үшін жасалған екен: көпірде төрт жолақ бар, ал ары қарай Сәтпаев даңғылында – үш жолақ. Соның салдарынан көлік ағыны күрт тарылып, қауіпті жағдай тудыруы мүмкін.

- Осы жолдың реконструкциясы Сәтпаев-Жібек жолы қиылысындағы жол айырықтың құрылысы кезінде жүргізіледі. Ол қос деңгейлі болмақ. Бір бөлігі –  Фрешмаркеттен мешітке дейін, айналмалы жолмен бірге, екіншісі – Неке сарайынан Жібек жолы бойынша, - дейді қала әкімі Жақсылық Омар.

Жоба әзірленіп, мемлекеттік сараптамаға беріліп қойған. 1 мамырға дейін қорытындысы алынып, жұмыстардың басталатын уақыты белгілі болады.