Тұтынушылық несие бойынша 500 мыңнан астам қазақстандықтың кредиті жабылады, деп хабарлайды Алтайньюс тілшісі Капитал кз сайтына сілтеме жасап.

Естеріңізде болса, 26 маусымнан бері мемлекет басшысы Қасым-Жомарт Тоқаевтың Жарлығымен «ҚР азаматтарының борыштық жүктемесін азайтуға» байланысты шаралар жасалды. Яғни тұтынушылық несие бойынша көптеген азаматтадың несиесі өтелді. Еңбек және халықты әлеуметтік қорғау вице-министрі Светлана Жақыпованың айтуынша, аталмыш іс-шара жалғасады. Тіпті қазіргі уақытта тізімде 500 мың тұрғын бар көрінеді.

– Деректер қорын салыстырып тексеру жүргізілді. Кредиттік бюроға 2 миллион 289 мыңнан астам адам туралы мәлімет берілді. Енді кредиттік бюро екінші деңгейлі банктермен салыстырып, тұлғалардың кредиттерінің мөлшерін анықтайды. Қазірдің өзінде несиесі жабылатын 507 мыңға жуық адамның тізімі жасалып қойды, – дейді Светлана Жақыпова.

Вице-министрдің айтуынша, бір басында жалпы сомасы 3 миллион теңгеден аспайтын 2-3 несие бар адамдар кездеседі.

– Ерлі-зайыптылардың екеуінде де несиесі болса, қалай өтеледі? Осыған байланысты қоғамда көптеген сұрақтар туындап жатыр. Жарлықтың шартына сәйкес келсе, екеуінің де несиесі өтеледі, – деп түсіндірді С. Жақыпова.

Осы орайда айта кетейік, EGov порталында клиенттің мәртебесін айқындайтын сервис жұмыс істейді. Әрбір қазақстандық порталға ЭЦП арқылы тіркеліп, ЖСН енгізіп, кез-келген сауалға жауап ала алады.

– Алдағы уақытта сервисті жетілдіруді жоспарлап отырмыз. Себебі кейбір азаматтар өз мәртебесін анықтай алмады. Тағы да қайталаймын, аяқталмаған тізімдер әлі де толықтырылады, – деді Еңбек және халықты әлеуметтік қорғау вице-министрі Светлана Жақыпова.