Семейде жол апатынан көз жұмған футболшы қыздарды құрбылары еске алды, деп хабарлайды Алтайньюс тілшісі Arnapress.kz сайтына сілтеме жасап.

Естеріңізге сала кетсек, осыдан бірер күн бұрын біз Семей-Озерки тас жолында болған жантүршігерлік жол апаты жайлы жазған едік.

Көз жұмған төрт адамның ішінде Екатерина Чебаева мен Елизавета Старчукова есімді екі футболшы қыз да бар болатын.

14 тамыз күні Спартак стадионында еске алуға арналған матч өтті. Бір минут үнсіздікпен басталған ойынға Екатерина мен Елизаветаның барлық достары қатысты.

– Осы жерде жиылғандардың кез-келгені үшін бұл оқиға оңайға соққан жоқ. Әлі де сенгіміз келмейді. Катя мен Лиза Семейдің ғана емес Қазақ елінің мақтаныштары еді. Катя - Қазақстан футбол чемпионатының жүлдегері, оқушылар арасындағы спартакиаданың күміс медалінің иегері. Екеуінің де біз үшін орны бөлек, – деді жаттықтырушы Ғабиден Атентаев.