Төтенше жағдайлар министрлігінің құтқарушылары қар көшкінінің алдын алу жұмыстарын жүргізіп, оны сәтті түсірді. Шығыс Қазақстан облысында «Өскемен-Тарғын-Самар» және «Өскемен-Алтай» автожолдарының маңында көп мөлшерде қар жиналды. Бұл жағдай қар көшкінінің пайда болу қаупін арттырды, деп хабарлайды Altainews.kz  тілшісі.  

ТЖМ "Қазселденқорғау" филиалының мамандары осы қауіптің алдын алу үшін қар көшкінін түсіру жұмыстарын жүргізді. Нәтижесінде, екі учаскеден 14760 текше метр қар шығарылды. Қыс маусымы басталғалы бері осындай 37 қар түсіру жұмысы жүргізіліп, жалпы 31980 текше метр қар шығарылды.

Қазселденқорғау филиалының басшысы Советбек Станбеков қар көшкінінің пайда болу себептерін түсіндіріп өтті. Оның айтуынша, қар жауған кезде ауа температурасының ауытқуы немесе дөңестердегі жел қарды қозғап, көшкіннің жүруіне себеп болуы мүмкін. Алдын алу шаралары төтенше жағдайларды болдырмауға және автожолдар мен қысқы демалыс аймақтарын қорғауға бағытталған. Сонымен қатар, ол дауылды ескерту кезінде құтқарушылардың ұсыныстарын ескеруді халыққа қатаң ескертті.