Семейдің медициналық оқу орынын бітірген түлектердің 200-ден астамы ауылды жерге жұмыс істеуге аттанды. Енді аудан орталықтарындағы емханалар акушер-гинеколог, хирург, тіс дәрігері, терапевт сынды қат мамандармен толығады, деп хабарлайды Алтайньюс тілшісі.

– «Дипломмен ауылға» бағдарламасы жүзеге асқан 10 жылдың бедерінде талай жас ауылға аттанды. Біз де осы бағдарлама арқылы жұмысқа орналасып, кәсіби маман атанбақпыз. Денсаулық сақтау саласына тың күш қосатынымызға сенімдіміз, – дейді Бородулиха ауданының жас маманы – резидент-эндокринолог Балауса Жұматаева.

Семей медициналық университетінің қызметкері Гүлназ Таңатарованың айтуынша, биыл 743 студент оқуды аяқтаған. Соның 250-і өз облысымыз бен көрші Павлодар өңірінің ауылдарына барып жұмыс істемек.