Бүгін ҚР Орталық сайлау комиссиясының төрағасы Берік Имашевтың төрағалығымен комиссия отырысы өтті. Онда  2019 жылғы 9 маусымға тағайындалған Қазақстан Республикасы Президентінің кезектен тыс сайлауына халықаралық ұйымдардан байқаушыларды аккредиттеу туралы қаулы қабылданды, деп хабарлайды ҚазАқпарат.

 «2019 жылғы 6 мамырда Орталық сайлау комиссиясы  4 халықаралық ұйымнан 45 байқаушыны аккредиттеді. Аккредиттеуге ұсыныстардың келіп түсуіне қарай байқаушылар тізіміндегі деректер жаңартылып отырады. Шет мемлекеттер мен халықаралық ұйымдардың байқаушыларын аккредиттеуді Орталық сайлау комиссиясы 2019 жылғы 3 маусым күнгі сағат 18.00-ге дейін жүзеге асыратын болады. 2019 жылғы 8 мамырда Сыртқы істер  министрлігінің ЕҚЫҰ/ДИАҚБ мен Адам құқықтары бюросы миссияларынан 22 байқаушыны аккредиттеуге ұсыныс келіп түсті. Олардың барлығы аккредиттеуге шығарылып отыр. Осыған орай 2019 жылдың 7 мамырынан 13 мамырға дейін ұсынылған байқаушыларды қамтитын халықаралық ұйымдардың байқаушыларын аккредиттеу жөніндегі Орталық сайлау комиссиясының қаулысы әзірленді», - деді қаулы жобасын таныстырған ҚР Орталық сайлау комиссиясының мүшесі Зәуреш Баймолдина.

Оның атап өтуінше, бүгінгі күні еліміздің Сыртқы істер министрлігіне сайлауды жария ету мақсатында 25 шетелдік БАҚ-тың 66 өкілі өтінім берген. Олардың 37-сі аккредиттеуден өтті.

«Жалпы алғанда СІМ-де тұрақты негізде 28 шетелдік БАҚ-тың 94 журналисі аккредиттелді», - деді ол.

Қаулы жобасын Орталық сайлау комиссиясының мүшелері бірауыздан қолдап дауыс берді.

Айта кетейік, жалпы бүгінгі күні тіркелген шетелдік байқаушылардың саны 67 адамға жетіп отыр.