Радиоэлектроника және байланыс әскери-инженерлік институтының өкілдері Шығыс Қазақстан облысындағы әскери бөлімдер мен мектептерде ақпараттық-үгіт жұмыстарын жүргізді.

РЭжБӘИИ өкілдері Өскемен гарнизонының 27943 әскери бөліміндегі сарбаздармен, Өскемен қаласы, Глубокое, Алтай аудандарының 10-11 сынып оқушыларымен кездесті, деп хабарлайды Altaynews тілшісі Өскемен гарнизонының баспасөз қызметіне сілтеме жасап.

Радиоэлектроника және байланыс әскери-инженерлік институты - Орта Азияның посткеңестік республикаларында радиотехникалық мамандықтар бойынша офицер-инженерлер даярлайтын тұңғыш және жалғыз әскери жоғары оқу орны.

Институттың заманауи оқу-материалдық базасы бар. Курсанттардың теориялық білімдерін бекіту мақсатында институттың оқу орталығында әскери техника мен әскери қаруландыру практикалық сабақтары өткізіледі. Курсанттар нақты жауынгерлік техникада жұмыс істеп, зениттік және зымырандық техникаларға, радиолокациялық станцияларға және әскери байланыс техникасы құралдарында қызмет көрсетеді. Оқу орталығында курсанттарға арналған оқу корпусы, казарма және асхана, әскери техниканы сақтауға арналған ангарлар мен далалық сабақтарды қамтамасыз етуге арналған оқу алаңдары бар.

Кездесу барысында институт өкілдері РЭжБӘИИ-де оқудың ерекшелігімен және оқу-материалдық базасымен таныстырып, курсанттардың тыныс-тіршілігі жайлы айтып берді.

Жиналғандарға Орталық Азия аймағындағы радиотехникалық мамандықтар бойынша офицер-инженерлерді, Ақпараттық технологиялар, байланыс, ақпараттық қауіпсіздік мамандарын, әуе шабуылына қарсы қорғаныс әскерлерінің мамандарын даярлайтын жалғыз бейінді жоғары оқу орны болып табылатын РЭжБӘИИ-да құжаттарды қабылдау шарттары мен оқу бағдарламалары туралы материалдар мен бейнероликтер ұсынылды.