Биылғы қыстың күрт ауытқыған ауа райына байланысты ШҚО-да су тасқыны қаупі жоғары аймақтарға шолу жасалды. Бұл жергілікті биліктен осал учаскелерге ерекше назар аударуды талап етеді, деп хабарлайды Altainews.kz  тілшісі.  

Су басу қаупі бар учаскелерді аралаған соң, Шығыс Қазақстан облысының әкімі Ермек Көшербаев «Қаздорхоз», «ҚазАвтоЖол», «Қазгидромет», ШҚО ТЖД, ПД, көлік, табиғатты пайдалану, жұмылдыру дайындығы басқармаларының өкілдерімен және Тарбағатай ауданы әкімі мен Зайсан ауданы әкімінің орынбасарымен жедел кеңес өткізді. Бұл аудандарда жер асты сулары негізгі жолдарға жайылып кету қаупі бар.  
Облыс басшысы Марқакөл мен Күршім аудандарында жерасты және еріген қар суларын бөлуді реттейтін әдістердің тиімді қолданылып жатқанын атап өтті.  

Қыс мезгілінде жол қабатын нығайту көктемгі су тасқынына дайындықтың маңызды бөлігі саналады. Бұл жол сапасын сақтап, кейінгі жөндеу шығындарын азайтуға мүмкіндік береді. Осыған байланысты Шығыс Қазақстан облысында Омбы – Майқапшағай – Қалжыр – Марқакөл автожолының учаскесін абаттандыру жұмыстары жүргізілуде.  

Зайсан ауданы Дайыр ауылдық округіне жақын трассаның 5-ші шақырымында ауа райының аномальды жылы болуына байланысты (сол күндері кей жерлерде ауа температурасы +2°C-қа дейін көтерілген) жол жиектерінде жерасты сулары жинала бастаған. Көктемде қар қарқынды еріген кезде бұл жағдай қайталанбас үшін коммуналдық қызметтер трассаны нығайту және бөгет салу жұмыстарын бастап кетті.  

Су тасқынының алдын алу шараларына жергілікті атқарушы органдар мен аудандық төтенше жағдайлар бөлімі жұмылдырылды.  
Құтқару қызметтері мен синоптиктердің мәліметінше, алдағы күндері өңірде температураның төмендеуі күтіледі, сондықтан бұл учаскеде судың жайылу немесе жол жабынын шайып кету қаупі жоқ.  

Мамандар осы учаске мен облыс жолдарының жай-күйін қадағалауды жалғастырады, бұл ауа райы жағдайларына дер кезінде әрекет етуге мүмкіндік береді.

Су тасқыны маусымына дайындық аясында қауіпті учаскелердің картасын әзірлеу жұмыстары басталды. Мониторинг төтенше жағдайлар бөлімі мамандары мен салалық мекемелер мамандарының қатысуымен жүргізілуде. Бұл карта алдағы іс-қимылды үйлестіріп, жедел әрекет етуге негіз болмақ.

Облыс әкімі су тасқыны кезінде тұрғындар арасында түсіндіру жұмыстарын жүргізудің маңыздылығын атап өтті. Бұл халыққа жағдай мен қабылданып жатқан шаралар туралы шынайы ақпаратты жеткізуге мүмкіндік береді.