Биыл елімізде басталған «Ауыл аманаты» бағдарламасын жүзеге асыруға ауыл шаруашылығы басқармасы арқылы 1 535 118 000 теңге несиелік қаражат бөлініп отыр.

12 қыркүйекке дейін осы соманың 50 пайызға жуығы ауыл тұрғындарына үлестірілген.Несие алуға аудандардан 100-ден астам өтінім түскен, деп хабарлайды Altaynews тілшісі.

Елімізде жергілікті ауылшаруашылық тауарларын өндірушілерді жан-жақты қолдау, ауыл тұрғындарын кәсіпке тарту, жеке қосалқы шаруашылықтарын дамыту арқылы кірістерін көбейту мақсатында «Ауыл аманаты» бағдарламасы жүзеге асырылып жатыр. Өскемендегі «Ертіс» ӘКК» АҚ – аталмыш бағдарлама бойынша бөлінетін несие қаражатын үлестірушінің бірі.

Бүгінге дейін облысқа қарасты аудандардан корпорацияға 100-ден астам өтінім түскен. Оның ішінде, барлығы 94 ауыл шаруашылығы саласы жобасына 759 900 000 теңге көлемінде несие берілді. Жылдық үстеменің 2,5 пайыз ғана болуы үлкен қолдау деп отыр ауыл тұрғындары. Жоба не бары 21 тамызда бастау алғанын және осы бір айға жетпес уақыт аралығында бөлінген қаражаттың жартысына жуығы игерілгенін ескерсек, сұраныстың көптігін аңғаруға болады.

Жамал Ермен