Шығыс Қазақстан облысында колледж студенттері машина жасаудың инновациялық технологияларын зерделейді.

Бұл түлектердің еңбек нарығында бәсекеге қабілетті болуына мүмкіндік береді, деп хабарлайды Altaynews.kz тілшісі.

Өскемен көпсалалы технологиялық колледжі бүгінге дейін сұранысқа ие жұмысшы мамандықтары бойынша кадр даярлап келеді. Атап айтсақ, мұнда автослесарь, электромонтер, газ дәнекерлеуші, бақылау-өлшеу аспаптары және автоматика слесарі, бухгалтер, аспаз, кондитер сынды мамандықтар бойынша 606 студент білім алады.

2019 жылы аталмыш оқу орнында заманауи жабдықтармен жабдықталған құзыреттілік орталығы ашылған. Бұл жерде студенттер іс жүзінде өндіріс процесінің негіздерін сезініп оқуға мүмкіндік алды.

Сондай-ақ бұл колледж дуальды оқыту жүйесінен де қалыс қалып жатқан жоқ. Биыл кәсіпорындардың өтінімдері бойынша мұнда 227 студент оқып жатыр.

Оқу орнына барған облыс әкімі Ермек Көшербаев оң нәтиже беріп келе жатқан дуальды оқытудың аясын кеңейту керек екенін айтты. Мәселен, Д.Серікбаев атындағы ШҚТУ жанынан құрылған Лу Бань шеберханасы автомобиль инженері мамандарын даярлауда жақсы әдіснамалық база бола алады. Облыс әкімі колледж бен шеберхана арасында ынтымақтастық орнату қажет екенін айтты.