Аймақ басшысы Даниал Ахметов Өскемендегі №46 мектепте оқыған ашық дәрісінен кейін оқушылармен емен-жарқын әңгімелесіп, сұрақтарына жауап берді, деп хабарлайды Алтайньюс тілшісі.

Өскемендегі №12 мектептің оқушысы Анна Луговая облыста қандай мамандықтарға сұраныс көп екенін сұрады. Аймақ басшысының айтуынша, бізде автоматизация және басқару, машина жасау, жылу энергетикасы, металлургия, техникалық физика, геодезия және картография, есептеу техникасы және бағдарламалық қамту, сондай-ақ медициналық және педагогикалық мамандықтар сұранысқа ие. Тиісінше білім гранттары соңғы екі жылда осы мамандықтарға бөлінген.

Жарма ауданы Маяковский атындағы орта мектептің оқушысы Жанель Жақанова шағынкомплектілі мектептерде ІТ-сыныптары ашыла ма деген сауал қойды.

Аймақ басшысы келер жылы 371 мектепте, яғни 202 шағын жинақты орта, 118 негізгі, 51 бастауыш мектепте ІТ-сыныптар ашылатынын жеткізді. Оларға 2869 компьютер қойылып, сол сыныптарда сабақ беретін 573 мұғалім оқытылады.

Абай ауданы Қарауыл ауылының оқушысы Мәдина Айтбаева Өскемендегі ШҚМТУ-ға түсуді армандап жүргенін айтып, егер оқуға түсіп жатса, қайда тұрам деген мәселе туындайтыны алға тартты. Облыс әкімі келер жылы Елбасының «Бес әлеуметтік бастамасы» аясында облыста 11 жатақхана салынатынын, соның бірі – ШҚМТУ арналған 600 орындық жатақхана екенін атап көрсетті. Студенттер үшін жатақхана мәселесі алдағы уақытта нақты шешілетін болады.