Облыстық қоғамдық кеңес жанындағы шағын және орта кәсіпкерлікті дамыту бойынша сараптау жұмыс тобының жетекшісі Елена Березинская-Абилованың айтуынша, қазіргі уақытта мектептердегі асхананың жабдықтары әбден ескірген, толықтай жаңалауды қажет етеді, деп хабарлайды Алтайньюс тілшісі.

– Сонымен бірге кәсіпкерлерге мектеп асханасын жалдауға берілетін бір жыл уақыт тым аз, себебі, кәсіпкер салған ақшасын ақтап та үлгермейді. Оның үстіне мектеп асханасының ас мәзірі әлі де 1972-1977 жылдарда әзірленген рецептура бойынша дайындалып келеді. Оқушыларды тамақтандыру бойынша барлық жерде жаңартылған бірыңғай стандарт енгізілсе, - дейді Елена Березинская-Абилова.

Атап өтерлігі, биыл санитарлық дәрігерлер өңірдегі 290 мектептің асханасына тексеру жүргізген, нәтижесінде 283-інде бұзушылықтар анықталған. Облыстық қоғамдық денсаулық сақтау департаменті өкілдерінің мәліметінше, білім ордаларында көбінде тоңазытқыштың температуралық режимі сақталмайды, тамақ өнімдерінің сапасы мен қауіпсіздігіне тиісті кепілдік құжаттары болмайды, ыдыс-аяқты жуудың ережелері мен талаптары сақталмайды.

Қоғамдық кеңес мүшелері сонымен бірге, сыбайлас жемқорлықтың алдын алу үшін мектеп асханасында қолма-қол ақшамен есеп айырысудан бас тарту керектігін ұсынды. Мұндай тәжірибе Астана қаласының мектептерінде енгізілген. Бұл өз кезегінде мұғалімдер мен ата-аналар комитетін балалардан күнделікті тамаққа ақша жинау жауапкершілігінен босатпақ.

Осы мәселеге қатысты пікірін білдірген облыс әкімінің орынбасары Әсем Нүсіпова кеңеске қатысып отырған қалалар мен аудандардың мектеп директорларына бүгінгі айтылғандардан тиісті қорытынды шығаруды және мектеп асханасын жаңарту мәселесімен айналысуды тапсырды. Оның сөзінше, аргарлық саласы жақсы дамыған біздің облыста оған мүмкіндік жетеді.