Байқошқар таудың қойнауына орналасқан малды ауыл. Бір шеті Шыңғыстаумен шектесіп, малы араласып, қойы қораласып жатыр. Бұл жердің табиғаты малға жайлы, жері шұрайлы өлке. Ауыл Байқошқар өзенінің Бақанасқа құяр тұсында . «Ескі кеңсе» «Бозқараған» қыстағынан алыс емес. Мұнда Мұхтар Мағауин ағамыздың ата- бабалары жатыр.

Негізі Абай атамыздың жайлауы осы жерден қашық емес, шығыс жағында. Ауыл көнекөздерінің айтуынша, «Абай бұлағы» деп аталатын мына бір жерде оның әйгілі «Жаз» өлеңі жазылған көрінеді. Шынында да:

Жаздыгүн шілде болғанда

Көкорай шалғын бәйшешек

Ұзарып, өсіп толғанда

Күркіреп жатқан өзенге

Көшіп ауыл қонғанда

Шұрқырап жатқан жылқының

Шалғыннан жоны жылтылдап

Ат, айғырлар, биелер

Бүйірі шығып ыңқылдап..., -деп келетін өлең жолдары дәл осы жердің суретін айқындап тұр. Рас, мұны әдебиет, өнер зерттеушілері анықтар. Біздің мақсат көрген, білгенді қағаз бетіне түсіру ғана.