Қалалық Мәдениет сарайында осынау «Рухани жаңғыру» бағдарламасына орай ШҚО мәдениет, архивтер және құжаттама басқармасының қолдауымен Әміре Қашаубаев атындағы мемлекеттік филармониясы  қазақ музыкасына өшпес мұра қалдырған әнші, актер, композитор, ақын Болат Сыбановтың 80-жылдығына арналған «Таң самалы» атты республикалық ән фестивалін ұйымдастырып отыр.

100-ден астам рөлдерді сахналап сомдаған, 60-тан астам әндердің авторы атанған Болат Сыбановтың көптеген әні Қазақстан теле-радио коорпорациясының «Алтын қорына» енген. Әншінің 1976 жылы «Ән шырқайды» күйтабағы шығып, 5 рет дискісі халыққа жолданған еді. Швеция, Түркия, Қытай, Моңғолия, Ресей сынды елдерде әндері кеңінен тараған. Семей қаласында және Оңтүстік Қазақстан облысы Леңгір ауданында әншіге көше аты берілген.

Республика көлемінде өткізілген Семейдегі осынау фестивалге Астанадан дәстүрлі әншілер Ербол Сарин, Толғанбай Сембаев, Тельман Нұртайлар ат арылтып келсе, Алматыдан Нұржан Жанпейісов, Қарағандыдан Сейл Аяғанов, Талдықорғаннан  Сая Есенгелдинова және басқа да өнер майталмандары қатысты. Сондай-ақ, Қазақстанның эстрада жұлдыздары Мақпал Исабекова, Нұргүл Нұғыманова, Қанат Сыбановтар да фестивалге ерекше атсалысты. Шығыс Қазақстан облысының қалалары мен аудандарынан іріктелген өнерпаздар  және әр облыстың мәдениет басқармалары ұсынған әншілері де қатыстырылды.