Жыл сайын «Semei» телеарнасы балалардың жаңашылдығына айрықша көңіл бөліп, бүгінгі күннің дарынды жастарын елге таныту мақсатында түрлі байқаулар ұйымдастырып келеді.

Биыл да бұл үрдіс жалғасын тауып, шығармашылық тележоба Елордамыздың 20 жылдығына орайластырылып, «Сәлем, Семей» бағдарламасы аясында «Мерейтойыңмен, Астана» атты сурет байқауы өтті.

Байқауға қатысқан 20-ға жуық жас суретші тікелей эфирде Астана туралы ойларын қағазға түсіріп, өздері қалаған көріністі әдемілеп суреттеп беруге тырысты. Шығармашылық жұмыстар «Semei» арнасының сайтына жүктеліп, үздік туындылар көрермен дауысы арқылы анықталды. Сайыстың ақтық сынына 9 жұмыс өткен болатын. Ал, бүгін 1 аптаға жалғасқан бәсеке өз мәресіне жетті. Көрерменнің көп дауысын жинаған жүлдегерлердің барлығы байқау демеушісі «Еurasia Aqro Holdinq» ЖШС ұсынған бағалы сыйлықтарға ие болды.

Сайыстың қортындысына сәйкес, дауыс нәтижиесі бойынша қарсыластарынан оқ бойы озық тұрған Ажар Нұрғали 1-ші орын иеленіп, планшет ұтып алды. Сондай-ақ, Мақсат Қапанов пен Алтынай Әбішева болса жеңімпаздар қатарынан көрініп, смарт-сағаттармен марапатталды. Өзге де жүлдегерлер бағалы сыйлықтарға және арнайы дипломдарға қол жеткізді.

Ұйымдастырушылардың айтуынша, жас жеткіншектердің Отанын сүюге, туған жерге, тарихи мұраларға құрметпен қарауға тәрбиелеуді мақсат еткен осындай байқаулар алдағы уақытта да жалғасын табатын болады.