Былтырдан бастап Минск автокөлік зауытымен ынтымақтастық байланыс орнатқан «Семей машина құрастыру зауыты» АҚ келер жылы кәсіпорында беларустық әріптестерінің көмегімен «МАЗ» автотехникаларын құрастыратын жаңа өндіріс түрін ашуды жоспарлап отыр, деп хабарлайды Аltaynews.kz тілшісі.

Құны 1,5 млрд. теңге болатын инвестициялық жобаны зауыттың өзі құрамына кіретін «Қазақстан инжениринг ҰК» АҚ қаржыландырмақ. Кәсіпорынның бас директоры Нұрлан Омаровтың айтуынша, қазір зауытта заманауи жаңа құрал-жабдықтарды орналастыратын өндіріс алаңдары дайындалып жатыр.

2013 жылы Минскідегі автокөлік зауытымен бірлесе отырып «МАЗ» маркілі автокөліктерінің тіркемелерін шығаруға кіріскен семейлік зауыт бүгінде олармен өзара байланыстарын екі бағытта жалғастыруда. Біріншісі - «МАЗ», «КамАЗ», басқа да ауыр жүк көліктерінің тіркемелерін шығару болса, екінші бағыт - алдағы жылы жаңадан ашылатын өндірісте - «МАЗ» маркілерінің әскери түрлерін, жүкті өздігінен төгетін машиналарды құрастыру.