Құрметті шығысқазақстандықтар!
Біздің еліміз өзінің ұлттық мерекесі – Қазақстан Республикасының Тәуелсіздік күнін тойлауда.
Биыл – егемен еліміз үшін ерекше жыл. Өйткені, биыл – жаңа «Қазақстан-2050» ұлттық Стратегиясының жүзеге аса бастаған жылы. Және ол «Қуатты аймақ – қуатты Қазақстан» атты аймақаралық интеграция аясында жүзеге асуда.
Шілде айында Өскеменде Алматы, Шығыс Қазақстан, Қарағанды және Павлодар облыстарының қатысуымен республикалық өңіраралық форумы өтіп, оның қорытындысында аймақаралық байланыстарды нығайту, өзара сауда-экономикалық, ғылыми-техникалық және мәдени байланыстарды нығайту бойынша төртжақты келісімге қол қойылған болатын.
Прогресс жолындағы өзара әріптестік – елімізді дамытудың бірден-бір қуатты жолы. Біз ендігі жерде тіптен жақындаса түстік. Алматы облысы мен Шығыс Қазақстан облысы бір-біріне шекаралас жатқан аймақтар болып табылады. Енді екі облысты экономикалық және достық байланыстар біріктіре түскендей.
Мен сіздерді жер жәннаты – Жетісу тұрғындары атынан Тәуелсіздік мерекесімен құттықтаймын! Барша-ңызға мықты денсаулық, отбасыларыңызға бақ-береке, жемісті еңбек және барлық мақсаттарыңыздың жүзеге асуына тілектеспін! Мекендеріңізде тек тыныштық, тұрақтылық және молшылық болсын!
Аңсар МҰСАХАНОВ,
Алматы облысының әкімі