А.С. Пушкин атындағы облыстық кітапхана 1-маусым Балаларды қорғаудың халықаралық күні бүлдіршіндерге шат-шадыман көңіл-күй сыйлау мақсатында таңғажайып мереке өткізеді, деп хабарлайды Аltaynews.kz тілшісі кітапхананың баспасөз қызметіне сілтеме жасап.


Кітапхана қызметкерлерінің айтуынша, жаз шымылдығын балғындар өз қиялындағы ертегі кейіпкерлерімен бірге ашатын болады. Алдар Көсе мен Дюймовочка өнерлі балалардың көмегімен Шапокляктан жаздың кілтін алып, Жаз аруды қарсы алады. Кілтті қолға түсіргеннен кейін жаз мерекесі көңілді жалғасын табады.

Сүйікті кейіпкерлерімен бірге балалар кітапхананың жазғы алаңында ойындар ойнап, викториналар шешеді. Асфальтқа балалар қолымен салынған суреттер арқылы «Әлемге балалар көзімен» қарауға болады. Ал көрмеде ұсынылған қызықты да көздің жауын алар суреттермен безендірілген кітаптар, мерзімді басылымдар танымдық мәліметтер беріп қана қоймай, ертегілер еліне саяхат та жасатады.

«Бұдан соң полиглоттардың қуыршақ театры әзірлеген «Үйшік» ертегісінің қойылымын тамашалауға болады. Жыл бойы үйірмелерге қатысып, қағаз бен тұзды қамырдан бұйым жасаудың шеберіне айналған балалар өз шеберліктерін құрбыларына үйретеді», дейді шараның үйлестірушісі Татьяна Попова.