1-сәуірде бас қаламыз Астананың 15 жылдығына орай балаларға арналған «Аялаған Астана» республикалық баяқауы басталды. Бүгінге дейін еліміздің 4 қаласында өткен кастингте 170 дарынды бала өз өнерін көрсетіп үлгерді , деп хабарлайды Аltaynews.kz тілшісі байқау ұйымдастырушыларының мәліметіне сүйеніп.
Байқаудың басты мақсаты – ел ішінен 8 бен 14 жас аралығындағы эстрадалық-вокалдық жанрда ән шырқайтын талантты жас әншілерді іріктеп алу. Бұл байқау Астана қаласы әкімшілігі және Игорь Крутойдың «АРС» компаниясының ұйымдастыруымен өтеді.
Жас дарындарды табу мақсатымен атақты эстарадалық жұлдыздардан құралған жетекшілер тобы Қазақстанның 14 облыстық орталығын, Астана және Алматы қалаларын аралауда. Олардың ішінде Мәдина Садуақасова, Әлішер Егембердиев, Бүркіт, Жұлдыз, Айқын Төлепберген, Мөлдір Әуелбекова, Батыр Байназаров («Ринго»), Алмас Кішкенбаев, Жанболат Беделхан («Орда») және Алтынай Жорабаева бар.
Байқау телевизиялық таспаға жазылып, қалың көрерменге «Бірінші арна. Еуразия» телеарнасынан ұсынылатын болады. Телекүнделіктердің жүргізушісі - әнші Батыржан Тазабеков.
Құрамында қазақстандық және ресей эстрадасының жұлдыздары мен продюсерлері бар қазылар алқасы жартылай финалға 12 сайыскер таңдайды. Мамыр айында олар Астана қаласына келіп, жартылай финалға дайындалады. Әр қатысушының шығармашылық тұрғыда өсуін, сольфеджио, хореография, актерлік шеберліктерін Мәскеудің атақты режиссері Лина Арифулина бастаған арнайы педагогтар тобы қадағалап отырады.
«Жартылай финалға өткен 12 жас таланттар 1 маусымнан бастап «Балалық шақ әнұраны», «Жұлдызды дуэт» және «Әлемдік хит» атты номинациялары бойынша әр сенбіде тікелей эфирге шығатын болады. Келесі кезекте қазақстандықтар эстрада жұлдызын SMS арқылы дауыс берумен бағалай отырып, өздері таңдайды. Қызық болуы үшін дауыс беру нәтижелері байқаудың соңғы минутына дейін құпия түрде сақталады. Жеңімпаздың аты-жөні 6-шілде күні белгілі болады. Оның есімін тікелей эфирде өтетін гала-концерт жариялайтын болады» дейді байқаудың үйлестірушісі Әсия Яралы.
