Өскемен қаласындағы Металлургтердің мәдениет сарайында өңірдегі жастардың шығармашылығын ұштау мақсатында «Жас қанат» атты жас орындаушылардың байқауы өтеді, деп хабарлайды Аltaynews.kz тілшісі облыстық мәдениет басқармасының баспасөз қызметінің мәліметіне сүйеніп.
Облыстық іріктеуден өткен жас өнерпаздарға 2013 жылдың мамыр айында өтетін республикалық «Жас қанат» байқауына жолдама беріледі.
Ән байқауының шарттары бойынша додаға жастары 30-ға жетпеген жеке орындаушылар да, вокалды ән топтарының әншілері де қатыса алады. Қазылар талқысына екі ән ұсынылуы тиіс. Репертуарға шектеу қойылмағанымен, әннің өңделуі заман талабына сай болуы керек екен.