Шемонайха аудандық балалар кітапханасында «Қымбатты бауырсақ» атты ойын бағдарламасы өтті. Бұл қызықтан мүмкіндігі шектеулі балғындар да тыс қалмады.
Тәбетті ашатын кеште балалар аянып қалмай, бар өнерлерін ортаға салуға тырысты. Мысалы, 2-сынып оқушылары Сәбина Уалханова мен Әмина Қабаева мың бұралып, «Қаражорға» биін билесе, 3-сынып оқушысы Ербол Исмаилов бауырсақтардың әнұранын орындады.
Бұдан кейін қонақтар ұлттық тағам – бауырсақтың шығу тарихынан сыр шерткен «Құймақ пен бауырсақ» атты мысалды қызыға тыңдады. Мерекеде ұйымдастырылған «Кімнің бауырсағы ең әдемі», «Бауырсаққа көмектес» сияқты ойындар балғындардың белсенділігін арттырып, кеш ажарын аша түсті.
altaynews.kz