Бүгін Астанадағы Қазақ ұлттық өнер университетінде жеңімпаз атанған ұстаздарға «Жоғарғы оқу орнының үздік оқытушысы - 2011» мемлекеттік гранттарын тапсыру салтанаты өтті.
Биыл республиканың 55 жоғарғы оқу орнынан 200 оқытушы аталған мемлекеттік гранттың иегері атанып отыр. Конкурс басталғаннан бері жеңімпаз атанған ұстаздардың қатарында профессорлар мен ғылым докторларының көбейгендігі байқалады. Бүгінде олардың үлесі 73 пайызға дейін жетті.
Жалпы, биылғы конкурсқа 83 жоғары оқу орнынан 600-ден астам үміткер қатысты. Олардың тек 200-і ғана «Жоғарғы оқу орнының үздік оқытушысы» мемлекеттік грантының иегері атанды. Әр гранттың жалпы сомасы 3,2 млн. теңге. Бұл ақшаға конкурс жеңімпаздары өздерінің ғылыми жұмыстарын әрі қарай жалғастырып, шетелдің маңдайалды университеттерінен тәжірибе жинақтай алады.
