Техникалық шығармашылық және өнертапқыштардың кезекті республикалық байқауы Өскемен қаласында өтті. Бұл жолы жас техниктер ұшақ, зымыран, көлік, кеме және қайықтар құрастыру бойынша сынға түсіп, 10-17 жас аралығындағы 180 оқушы өзара мықтыны анықтады, деп хабарлайды Altainews.kz тілшісі.

Қазақстан Республикасы Оқу-ағарту министрлігінің қосымша білім беру оқу-әдістемелік орталығы техникалық шығармашылық және өнертапқыштардың кезекті республикалық байқауының қорытынды кезеңін Шығыс Қазақстан облысы орталығында өткізді.

Әуе, зымыран, көлік, кеме модельдеу бойынша техникалық шығармашылық және өнертапқыштардың байқауы 13 жылдан бері дәстүрлі түрде өткізіліп келеді. Биылғы республикалық байқауға 10-17 жас аралығындағы 180 оқушы қатысқан. Олардың барлығы да өңірлік байқауларда бақ сынаған 20 мың оқушының арасынан топ жарған жеңімпаз өнертапқыштар. 

Жарыс бағдарламасына орай радиомен басқарылатын авто, авиа, зымыран, кеме модельдері бойынша командалық жарыстар қаланың әр жерінде өтіп, өнертапқыштар өзара мықтыны анықтады.
Жалпы бұл байқаудың мақсаты айқын, мәні зор. Еліміздегі білім алушылардың құрастырушылық ойлауын дамыту, жас техниктерді зерттеу және өнертапқыштық қызметке тарту. Сондай-ақ әртүрлі білім беру ұйымдарының педагогтеріне де өзара тәжірибе алмасуға мүмкіндік беріп, ғылымдағы жолды бір арнаға тоғыстыру.