Өскемен қаласында Қазақстан мен Ресейдің танымал кәсіпкерлерінің қатысуымен "Нарық көшбасшылары" форумы өтті. Оған жүзден астам бизнес өкілі қатысып,  өз саласында сұранысқа ие сарапшы не кәсіпкер болудың қыр-сырымен бөлісті, деп хабарлайды Altainews.kz тілшісі.

Форумның басты спикері  Дулат Бижанов - Forbes тізіміндегі 30 жасқа дейінгі бизнесмендердің бірі, Марғұлан Сейсембаев, Арман Юсупов, Карина Оксукпаева және тағы басқа миллионерлердің продюсері. 

- Бизнесмендермен жұмыс істеймін, екі жылдан бері Қазақстан-Ресей кәсіпкерлерінің серіктестіктерін қолдап, сарапшылардың танымал болуына, команда мен басшыларды қолдауға көмектесіп келемін. Косметология, медицина, сату, SMM бағыттарында менен қолдау сұрайтындар көп. Басшылары өз бизнестерін қалай құру туралы кеңес беруімді сұрайды. Мен оларға сенімсіздіктерін, қорқынышты жоюды үйретемін. Кәсіпкерлікті гұлдендіру әдістерімен бөлісуге келдім, - деді форумның спикерлерінің бірі -халықаралық коуч, халықаралық  кәсіпкер Оксана Саликова.

Семейлік Данажан Амангелдіқызы жеті жыл бұрын«Баланс»  балалар орталығының негізін қалаған кәсіпкер.
-Орталықта екі жарым жастан алты жасқа дейінгі балақайлармен жұмыс жасаймыз, маңыздысы - балақайларды жан-жақты әрі үйлесімділікте дамытуды көздейміз. Форумға жаңа білім алам, жаңа тәжірибелер жинақтаймын деген үмітпен келдім. Біздің заманымызда бизнесіңді дөңгелетіп әкету оңай емес. Іріктеліп алынған спикерлердің бізге берері көп, осы шараға келгеніме қуаныштымын, - деп бөлісті Данажан Амангелдіқызы. 

Кәсіпкерлер өз бизнестерін қалай құрғандары және алғашқы миллиондарын қалай тапқандары туралы тәжірибелері мен әдістерін ортаға салды. Форумда онлайн және офлайн кәсіпкерліктің трендтері, 2024-2025 жылдың  сатылымдары, тәжірибе жинақтауға көптеген жылдарын сарп етпей, өз кірістерін қазір ұлғайту үшін қандай әдістемелерді енгізу керектігі туралы ақпарат берілді.

Айна Ескенқызы