Алматы – еліміздегі экологиялық бекеттері бар, атмосфералық ауаға автокөлік құралдарының газдарымен ластаушы заттардың шығарындыларын өлшейтін жалғыз қала. Алматы қаласы экология және қоршаған орта басқармасының мәліметінше, қалада 19 стационарлық нүкте және үш мобильді топ жұмыс істейді. Жыл басынан бері мегаполисте рұқсат етілген шекті нормалардан асып кеткені үшін 25 000-нан астам жүргізушіге айыппұл салынды, деп хабарлайды Altainews.kz тілшісі Tengri Auto порталына сілтеме жасап.

Экопосттар қалай жұмыс істейді?

• Посттар таңғы 8:00-ден кешкі 20:00-ге дейін жұмыс істейді.
• Қалаға кіреберістерге орналасқан.
• Әр постта аккредиттелген зертхана экологы мен полиция қызметкері бар.
• Шамадан тыс түтін шығаратын көліктер тоқтатылып, арнайы құрылғымен газ талдауы жүргізіледі.
• Бензин және газбен жүретін көліктерден көмірсутек пен көміртек оксиді тексеріледі, ал дизельді көліктер түтін көрсеткіштері бойынша бағаланады.

Егер рұқсат етілген шектен асып кетсе, айыппұл салынып, көлік нөмірі алынуы мүмкін. Жүргізуші ақауды түзеткен соң қайта тексеруден өтіп, нөмірін қайта алады. Кейбір жүргізушілер өз еркімен экопосттарға барып, көліктерін тексеруде. Қалада 15-тен астам сервистік станция тек жанармай жүйесі мен катализаторларды жөндеумен айналысады.