ШҚО-ның Алтай ауданында ауыл шаруашылығы қарқынды дамып келеді. Аудан әкімі Ренат Құрмамбаевтың мәлімдеуінше, 2028 жылға дейін жалпы құны 49,6 миллиард теңгені құрайтын 7 ірі инвестициялық жобаны іске асыру жоспарланған, деп хабарлайды Altainews.kz тілшісі.

Басты бағыт – жалпы 5200 бас сауынды сиырға арналған алты сүт-тауар фермасын салу және жаңғырту. Аталған жобалардың құны 42,3 миллиард теңгені құрайды. Жыл сайын 6,3 миллиард теңгенің өнімі өндірілмек.

Ірі жобалардың бірі – Полянское ауылында 1075 басқа арналған сүт-тауар фермасының құрылысы. Бұл нысанды «Мойылды Байқоңыр» ЖШС жүзеге асырып жатыр. Жоба жылына 6500 тонна сүт өндіруге мүмкіндік береді.

Сондай-ақ Шірікқайың ауылында «Средигорненский-2» ЖШС Германиядан 95 жоғары өнімді симменталь тұқымды сиыр сатып алған. Биыл қосымша тағы 255 бас мал жеткізіліп, жалпы мал басы 600-ге жетеді. Бұл ферма жылына 2000 тонна сүт өндіре алады.

Жобалар нәтижесінде ауылдық жерлерде шамамен 200 жұмыс орны ашылады. Бұл ауыл тұрғындарын жұмыспен қамтып, олардың табысын арттыруға ықпал етеді.

Жаңа фермалар заманауи агротехнологиялармен жабдықталады. Импорттық тұқымдар, автоматтандырылған азықтандыру және сауу жүйелері, ресурсты үнемдейтін әдістер қолдану арқылы өнім сапасы артып, сүттің өзіндік құны төмендейді деп күтілуде.