Шығыс Қазақстан облысында келесі жылға арналған бюджет қайта қаралып, өңірдің әлеуметтік салаларына бағытталатын қаражат айтарлықтай артты. Облыстық мәслихаттың кезектен тыс сессиясында қабылданған түзетулер білім беру, медицина, энергетика және инфрақұрылымды дамытуға ерекше басымдық беріліп отырғанын көрсетті. Бұл аймақ халқы көптен күткен жобалардың жүзеге аса бастайтынын білдіреді, деп хабарлайды Altainews.kz.

Облыстық мәслихаттың кезектен тыс сессиясында ШҚО экономика және бюджеттік жоспарлау басқармасының басшысы Нұрсұлтан Маратовтың айтуынша, бюджет түзетуі бюджет заңнамасына сәйкес дайындалған және екі негізгі факторға байланысты: республикалық трансферттер көлемінің өзгеруі мен кіріс бөлігінің артығымен орындалуы. Облыс бюджетінің жалпы түсімі 495,3 миллиард теңгені, шығысы 536,2 миллиард теңгені құрайды. 

Өңірдегі ең өзекті бағыттардың бірі – білім беру жүйесін жаңғырту. «Келешек мектептері» ұлттық пилоттық жобасы аясында республикалық трансферттердің азаюы байқалғанымен, жобалар тоқтамайды. Өскеменнің 19-шағын ауданындағы 600 орындық, Белоусовкадағы 300 орындық, Глубокое ауданының Опытное поле ауылындағы 300 орындық мектептердің құрылысы жалғасады. Облыстың өз кірістерінен бұл салаға қомақты қаражат бөлінді: педагогтердің еңбекақысына — 857,8 млн теңге, коммуналдық шығындарға — 495,2 млн теңге, оқыту мен тамақтандыруды қамтамасыз етуге — 390 млн теңге, жеке балабақшаларға мемлекеттік тапсырысты толықтыруға 385 млн теңге қарастырылды. Бұл білім беру ұйымдарының жұмысын тұрақтандырып, жаңа мектептерді ашуға дайындықты күшейтеді.

Денсаулық сақтау саласы да назардан тыс қалған жоқ. Риддер қаласында 200 төсектік көпсалалы аурухана мен тәулігіне 500 адам қабылдайтын емхана салуға бағытталған мақсатты трансферттер қысқарғанымен, өңір бұл жобаны жалғастыруға ниетті. Сонымен қатар республика тарапынан Өскеменде 300 төсектік жаңа көпсалалы аурухана салуға қосымша қаржы бөлінуде. Бұл ауруханалар өңірдегі медициналық қызметтің қолжетімділігін кеңейтіп, ұзақ жылдар бойы шешілмей келген кадрлық және инфрақұрылымдық жүктемені төмендетуге мүмкіндік береді.

Қысы қатты, климаты күрделі Шығыс Қазақстан үшін жылумен қамту мәселесі — стратегиялық міндет. Осыған байланысты облыс өз кірістерінен Риддер қаласына ерекше назар аударып отыр. Қаржыландырудың нақты мөлшерлері келесідей: Риддер жылу электр орталығының технологиялық жабдықтарын күрделі жөндеуді аяқтауға — 180,3 млн теңге, қаладағы жылу желілерін жөндеуге — 236,5 млн теңге бөлінді. Сонымен бірге Өскемендегі «Шығыс Жылу» кәсіпорнына көмір сатып алуға жұмсалатын шығындарды субсидиялау үшін 277,2 млн теңге қарастырылған. Бұл қаражат өңірдің жылу маусымына дайындық деңгейін айтарлықтай күшейтеді.

Инфрақұрылымды жаңарту бағытында да нақты жобалар бар. Серебрянск қаласындағы Некрасов көшесінің инженерлік жүйелерін жаңғырту жұмыстары жалғасады. Зайсан ауданының Жарсу ауылында мектептің спорт корпусын аяқтауға 20,1 млн теңге, Айнабұлақ ауылындағы спорт модулін толық бітіруге 17,7 млн теңге бөлінді. Мұндай жұмыстар ауылдық жерде спорт пен бұқаралық дене шынықтыруға қолжетімділікті арттыруға мүмкіндік береді.

Бюджет нақтылау аясында алдағы жылы өтетін аудан және қала әкімдерінің тікелей сайлауын ұйымдастыруға қажетті қаражат та бекітілді. Бұл — Қазақстандағы жергілікті басқаруды жаңғырту процесінің бір бөлігі.

Нақты қаражат көлемдері мен жобалардың мәртебесін ескере отырып, облыстық мәслихат 2025 жылды әлеуметтік инфрақұрылымды жаңарту жылы болады деп отыр. Мектептер мен ауруханалар құрылысы, жылу жүйелерін жөндеу, ауылдық жерлердегі инфрақұрылымды жақсарту — мұның бәрі өңір тұрғындарының күнделікті өміріне тікелей әсер етеді. Нақтыланған бюджет Шығыс Қазақстанда әлеуметтік жобалардың тоқтаусыз әрі жоспарлы түрде жүзеге асуына жағдай жасайды.

Дамир Омаров 

Фото/видео: Жәнібек Ырысбай