Өскеменнің Аблакетка шағын ауданында халықтың игілігіне тағы бір нысан пайдалануға берілді. 2000 шаршы метрді алаңды алып жатқан «Асқар тау» - енді тойхана емес, мәдени бос уақыт өткізетін жер.

Қала әкімі Жақсылық Омардың айтуынша, ғимараттың иесі көп сөзге келмей, қала билігінің ұсынысымен келіскен.

Осылайша, Қазақстан халқының бірлігі күні қарсаңында мәдени-демалыс орталығында алғашқы мерекелік концерт те өтті.

-  Бүгін сіздер үшін қуанышты күн. Бұл жер тарихы бар ғимарат болған. Кейін жекеге өтіп, тойхана болды. Енді, міне, сіздердің демалыс орындарыңызға айналдырып отырмыз. Осы жерде шағын ауданның әр-түрлі мерекелері өтіп, балаларыңыз спорт секциялары мен үйірмелерге, мәдени шараларға қатысатын болады. Бұл жұмысты жарты жыл бұрын бастағанбыз. Пандемия салдарынан той-томалақ азайды. Одан кейін аса бір тиімді бизнес болмаған соң, ғимараттың қожайынына нысанды халықтың игілігіне қайтару керектігін айттық. Оған да рахмет, көп созбай халықтың игілігіне пайдалануға берді, - деп тұрғындарды құттықтады Өскемен әкімі Жақсылық Омар.

Мұнда тек мәдени-көпшілік шаралар ғана емес, балаларға арналған шығармашылық үйірмелер ұйымдастыру, кітапхана, спорт залы, дене шынықтыру залын ашу жоспарлануда.

Алдағы уақытта қай ұжымның қайда отыратыны, қандай үйірмелер жұмыс істейтіні жөнінде арнайы комиссия құрылып, тұрғындарға хабарланады. Дегенмен, шағын аудан тұрғындары да өз ұсыныстарын жеткізе алады.

-   Естеріңізде болса, бұрын бұл жерде «Импульс» атауымен кинотеатр болған. Жақсы бір атау бар болса, тұрғындармен келісіп, қарастырайық, - деді Жақсылық Омар.

Жиналған жұрттың көбі тарихи атауын қалдырайық десе, енді бірі қазақша атау немесе «Асқар тау» деп қалдырайық десті.

-  «Асқар Тау» деген тойхана атауын қалдырудің қажеті жоқ деп ойлаймын. Себебі көбі бұл жерді мейрамханамен байланыстыратын болады. Қазақша қояйық, ағылшынша қояйық, орысша қояйық. Ең бастысы елдің көңілінен шықса болды, - деп қосты қала әкімі.

Ал Аблакетка тұрғындары болса, бұл хабарды асқан қуанышпен қабылдады. Олардың айтуынша, мұндай орталықтың ашылуы ықшам ауданның шығармашылық және спорттық өмірінің жандануына жағдай жасайды.

- Мұндай ғимараттың мемлекеттік қарамағына өткеніне қуаныштымыз. Ауданда мереке өткізетін жер болмаған. Енді балалар үйірмелер бара алады. Әйтпесе, балалар мектептегі каратэ үйірмесіне ғана, қалаға арнайы баратын, - дейді Островский көшесінің тұрғыны Татьяна Козлянская.