Бүгін облыс орталығында қатты жел соғып, салдарынан бірнеше ғимаратқа зақым келді. Ағаштар құлап, бірнеше көше жарықсыз қалған.

Есенберлин көшесіндегі көпқабаттың тұрғын үйлердің бірінің сайдингі ұшып кетсе, Әл-Фараби даңғылында аялдама кешені құлап, Красин көшесінде шатырдан ұшқан рубероид көліктерге зақым келтірген, деп хабарлайды Altaynews тілшісі.

Әлеуметтік желідегі жергілікті парақшаларда тұрғындар құлаған ағаштардың да суретін жарыса жариялап жатыр. Мәселен, Достық үйінің (ДКМ) маңында, Славский атындағы жағалауда және №11 мектеп-гимназияның жанында үлкен шыршалар тамырымен жұлынып кетсе, Красин кентінде жарық діңгегі бүлінген.

Сондай-ақ Меновное кенті мен Согра шағын ауданында бірнеше көше жарықсыз қалған.

ШҚО ТЖД өңір тұрғындарына қатты жел туралы алдын ала ескерткен болатын.