Биылғы оқу жылының аяқталуына да санаулы айлар ғана қалды. Бұл орайда мектеп бітіруші түлектерді «Қандай мамандықты таңдасам?», «Қай жоғары оқу орнына түскен дұрыс?», «Қазіргі еңбек нарығында қандай мамандықтар сұранысқа ие?» деген сияқты сан сауалдар толғандырады. Сондықтан бұл кезеңде оларға дұрыс бағыт-бағдар беретін маңызды алаңдар қажет екендігі даусыз.

Биылғы мектеп бітіруші түлектер үшін осындай жаңа мүмкіндіктер алаңын «Grant» білім беру орталығы ұйымдастырды, деп хабаралайды Altainews.kz тілшісі.

Шығыс Қазақстан облыстық филармониясының залында «Grant Fest» фестивалі өтті. Мектеп бітіруші түлектерге жоғары оқу орнын және болашақ мамандықтарын таңдауда бағыт-бағдар беретін ауқымды іс-шараға Өскеменнің білім ошақтарының 10-11 сынып оқушылары, олардың ата-аналары мен мектеп мұғалімдері қатысты.

«Grant» білім беру орталығының басшысы Құндыз Мұратқызының айтуынша, «Grant Fest» фестивалінің мақсаты мен басты ерекшелігі – оқушыларға жоғары білімге қол жеткізуді жеңілдету, саналы таңдау жасауға көмектесу және білім беру саласындағы соңғы мүмкіндіктермен таныстыру. Сонымен қатар, білім орталығы оқушыларды Ұлттық бірыңғай тестілеуге де дайындайтындығын айтты. Фестивальдің ойдағыдай өтуіне облыстық білім беру басқармасы мен Жастар ресурстық орталығы қолдау көрсеткен.

Фестиваль барысында еліміздің жетекші жоғары оқу орындары, соның ішінде басқа қалалардан келген университеттер де өздерінің білім беру бағдарламаларымен таныстырды. Олардың қатарында Л.Н.Гумилев атындағы Еуразия ұлттық университеті, Turan-Astana университеті, ІІМ Б.Бейсенов атындағы Қарағанды академиясы, Ғұмарбек Дәукеев атындағы Алматы Энергетика және байланыс университеті және Семей медицина университеті сияқты тоғыз жоғары оқу орны бар.

Шараға қатысушы оқушылардың басым бөлігінің пікірінше, Астана немесе Алматы қалаларындағы жоғары оқу орындарына түсуді жоспарлап отыр. Себебі, инфрақұрылымы барынша өркендеген, гүлденген және мәдени ошақтарға бай қалалар. Қарағанды полиция академиясын, Семей медициналық университетін және білім сапасы жағынан рейтингісі жоғары, облыстағы жетекші жоғары оқу орындары – Д.Серікбаев атындағы Шығыс Қазақстан техникалық университеті мен С.Аманжолов атындағы Шығыс Қазақстан университетін таңдаған түлектер де аз емес.

Еркебұлан Килибаевтың айтуынша, Елордадағы Л.Н.Гумилев атындағы Еуразия Ұлттық университетінің инфрақұрылымы 6 оқу ғимараты, 10 студенттер үйі, 2 спорт кешені, заманауи ғылыми кітапхана, спорттық-сауықтыру базасынан тұрады. Академиялық ұтқырлық және қос дипломды білім беру бағдарламалары аясында студенттер әлемнің 50-ден астам еліне оқуға бара алады. Мұнда студенттердің жан-жақты дамуына мүмкіндік жасалған. Жастардың жеке дамуына арналған 80-нен астам студенттер клубы жұмыс істейді. Осылайша студенттер университет өміріне ғана емес, сонымен қатар елдің қоғамдық өміріне де белсене араласады.

ҚР Ішкі істер министрлігінің Бәрімбек Бейсенов атындағы Қарағанды академиясы сотқа дейінгі тергеу қызметі бойынша тергеушілер мен анықтаушыларды және криминалистерді даярлайды. Академияның артықшылығына тоқталар болсақ, мұнда студенттер жатақхана, үш рет тамақтану, нысанды киім-кешек, медициналық қызмет көрсету, шәкіртақымен қамтылып, демалыс кезеңінде тұрақты тұратын жеріне және кері қайтуға жол жүру құны төленеді. Оқу кезеңі мерзімді әскери қызмет өткеруге теңестіріледі және еңбек өтіліне кіреді. Оқу орнын бітірген соң түлектерге жоғары білім дипломымен бірге полиция лейтенанты арнайы атағы беріледі.

Шараға қатысушылар оқу орындары мен мамандықтар туралы толық ақпарат алып қана қоймай, университет өкілдеріне университеттердің шекті баллы, шығармашылық емтихандар жайлы сауалдарын қойып, жеке ақыл-кеңес алды.

Шара барысында еліміздегі жетекші жоғары оқу орындарының көрмесі өтіп, мазмұнды конференциямен жалғасты.

                                                     Айжанат Бақытқызы