Өскемендегі қыздар төбелесі: зардап шеккен қыз ауруханадан шығарылды
Ашық дереккөздерден алынған сурет
Облыс орталығындағы сауда орталықтарының бірінде құрдастарынан аяусыз соққы жеген қыз ауруханадан шығарылды.
Десе де зардап шеккен қыздың туыстары қызға жеткілікті дәрежеде медициналық көмек көрсетілмеген деп санайды, деп хабарлайды Altaynews тілшісі.
Бұған дейін «Не молчи» қорының директоры Дина Смаилова қыз баланың оқиғадан 2 ай уақыт өтсе де жарақаты жазылмай, ауруханаға жатқызылғанын мәлімдеген болатын.
Ал қазіргі күні қыз баланың ауруханадан шығарылғаны анықталды.
– Мен әлі де мамандардың кеңесіне жүгінемін, себебі бір апта ішінде баланың алған жарақаты қалпына келуі мүмкін емес сияқты. Көзінің айналасындағы ісік қайтқанымен, бетіне қол тисе әлі де ауырады. Ал көзінің неліктен ісіп кеткенін біз білмейміз. Ауруханадан шығарған кезде дәрігер де ештеңе айтып, түсіндірмеді. Яғни, ол жауап бере алмайтынын, көз дәрігеріне жүгіну керектігін ғана айтты, – дейді қыздың әпкесі Тоғжан Досымова.
Қыз аураханаға жатқызылған кезде ШҚО денсаулық сақтау басқармасы оның бақылауда екенін және барлық қажетті ем-дом шаралары жасалатынын айтқан еді.
– Сіңілім бүгіннен бастап қашықтан оқуға ауыстырылды. Оған психологиялық тұрғыдан да, денсаулығына да қысым көрсетілген, – дейді әпкесі.
Сондай-ақ ол тергеу кезінде жәбірленушінің ауыр жарақат алғанын да ескеруді талап етіп отыр.
Оқи отырыңыз
