9-12 шілде аралығында Өскемен қаласында Ұлттық ұланның арнайы мақсаттағы бөлімшелерінің әскери қызметшілері арасынан күрең берет кию құқығына ие үміткерлерді таңдау сынақтары өтті.

Биыл аталмыш сынаққа 80-нен астам әскери қызметші қатысқан. Емтиханға рұқсат алу үшін олар теориялық тестілеуден өтіп, денешынықтыру, биіктіктегі дайындық, арнайы құрылғылармен төмен түсу, байланыс дайындығы, медициналық дайындық бойынша және т.б. емтихан тапсырды, деп хабарлайды Altaynews тілшісі.

Жауынгерлер ауа температурасы 40 градустан жоғары болғанына қарамастан таулы аймақта 30 шақырым қашықтықты жүгіріп өтті.

Үміткерлердің күйзеліске төзімділігін нығайту үшін кедергілер жолағының жанында жарылыстар ұйымдастырылып, оқ атылып тұрды. Мұндай әдіс жауынгерлік атмосфера тудырады және үміткерлердің күйзеліс жағдайларындағы реакциясын тексереді.

Кедергілерден кейін бірден үміткерлер жекпе-жек ұрысқа кірісті. Алдымен олар бір-бірімен, содан кейін күрең берет иелерімен шайқасты. Ауыр соққыларға төтеп берген және 3 минуттық 3 раундқа шыдап берген үміткер ғана күрең берет ала алады.

Кейінірек салтанатты жағдайда барлық сынақтардан сәтті өткен және соңғы кезеңнің қиындықтарына төтеп берген 19 үміткерге қастерлі күрең берет табысталды.

Биыл "Бүркіт" арнайы мақсаттағы бөлімшелерін дамытуға қосқан ерекше үлесі үшін күрең берет ішкі істер министрі полиция генерал-полковнигі Марат Ахметжановқа да табыс етілді.

Айта кету керек, "Бүркіт" арнайы бөлімшесінің жауынгерлерінің емтиханы мен дайындық деңгейі Өзбекстан Республикасынан келген әріптестер тарапынан да жоғары бағаға ие болды. Олар Ұлттық ұлан қолбасшылығына қазақстандық арнайы жасақтың өміріндегі маңызды тарихи сәттердің біріне куә болуға мүмкіндік бергені үшін ризашылықтарын білдірді.