«Әлем аруына» дайындық: Бағым Балтабаеваның алдағы жоспары (видео)
Биылғы Қазақстан аруы байқауының жеңімпазы Бағым Балтабаева ауқымды жарыста жеңіске жетіп, Өскемен қаласына оралды, деп хабарлайды Altainews.kz тілшісі.
Оны туған-туыстары, достары және өзі білім алатын жоғары оқу орнының ұжымы ерекше ықыласпен қарсы алды.
– Қызым бала кезінен сұлулыққа, әсемдікке әуес болып өсті. Тіпті осындай арулар байқауына қатысуды армандайтын. Біз оның арманын қолдадық. Жастайынан бимен айналысты, модельдік мектептен өтті. Менің ойымша, Қазақстан аруы бойында табиғи сұлулық пен ішкі үйлесім ғана емес, сонымен қатар білімділік, тәрбиелілік, үлкенге құрмет, кішіге ізет көрсету қасиеттері болуы қажет, – деп бөлісті Бағымның анасы Гүлназ Серікханқызы.
Бағымның анасы қызының байқауға дайындығына барынша қолдау көрсеткенін айтты. Өскеменнің арулары арасында өткен іріктеуде де, республика деңгейіндегі сайыста да анасы қызының жанында болып, оған барынша демеу болған.
– Шешуші финалда сахнада қаз-қатар тізілген сәтте жеңімпаздардың есімдері атала бастады. Өз есімімді естігенде бойымды қорқыныш, қуаныш, мақтаныш сезімдері қатар биледі. Осы жарысқа дайындық барысында сіңірген еңбегім мен ата-анамның үмітін ақтағаныма қатты қуандым. Шығысымыздың намысын абыроймен қорғағаныма мақтанамын, – деді Бағым Балтабаева.
Енді Бағымның мақсаты – «Әлем аруы – 2026» байқауында Қазақстанның атын лайықты дәрежеде таныту. Ол алдағы жылды осы ауқымды байқауға жан-жақты дайындыққа арнамақ.
Ақерке Рағызбаева
Фото: Махаббат Ахметжанова
Видео: Ермек Жиенбеков
Оқи отырыңыз
