Ауылдық жерлерде медицина кадрларының тапшылығы еліміздің көптеген аймақтарында өзекті мәселе болып отыр. Бұл мәселе әсіресе ауылдар мен шағын қалаларда айқын көрінеді, себебі көптеген дәрігерлер тек қалаларда жұмыс істей отырып, ауылдық жерлерге баруға ынталы емес, деп хабарлайды Altainews.kz  тілшісі.

Әсіресе Шығыс Қазақстан облысында, оның ішінде Алтай ауданы мен Тұрғысын ауылында дәрігер тапшылығы айқын сезілуде. Бұл жағдай ауыл тұрғындарының денсаулық сақтау қызметтеріне қолжетімділігін шектейді, әрі медициналық көмек алу үшін көп уақытты қажет етеді. Мұндай жағдай мемлекеттік органдар мен жергілікті әкімдіктердің ерекше назарын аударуды қажет етеді.

Бірақ мемлекет бұл мәселені шешу үшін бірнеше шараларды қолға алды, ең тиімдісі – «Дипломмен – ауылға» бағдарламасы. Бұл бағдарлама жас мамандарды ауылдарға жұмысқа тарту және оларды қажетті әлеуметтік қолдау арқылы тарту үшін енгізілген. 2009 жылы бастау алған бұл бағдарлама дәрігерлер мен мұғалімдерге ауылдық жерлерде тұрақтап, жұмыс істеу үшін көтермеақы, тұрғын үй және басқа да жеңілдіктер ұсынады. Жергілікті атқарушы органдардың бұл бастаманы қолдауы ауылдық жерлерде дәрігерлердің жұмыс істеу жағдайларын жақсартуға ықпал етті, сондай-ақ ауыл тұрғындарының медициналық қызметтерге қолжетімділігін арттырды. 2023 жылы «Дипломмен – ауылға» бағдарламасы аясында ауылға келген дәрігерлердің саны біршама артты.

Тұрғысын ауылының мысалында бұл бағдарлама өзінің тиімділігін дәлелдеді. Ажар Асқарбекова – Арқалық қаласының тумасы, 2014 жылы Қарағанды медицина университетін тәмамдағаннан кейін, үш жыл бойы Қарағанды қаласында тәжірибе жинақтап, жақында ғана «Дипломмен – ауылға» бағдарламасы аясында Алтай ауданына көшіп келді. Ажардың айтуынша, ауылдық жерге келіп, жұмыс істеу оның үшін жаңа мүмкіндік болды, өйткені ол жергілікті тұрғындармен тығыз байланыс орнатып, олардың денсаулығын жақсартуға мүмкіндік алады. Сонымен қатар, табиғаттың сұлулығы мен ауаның тазалығы да оған ауылда ұзақ уақыт болуға ықпал етті. Ол Тұрғысын ауылының тұрғындарын жылы қарсы алғанын және халықтың медицина қызметіне деген ықыласы мен сұранысын көргенін айтады. Ажардың ауылдық жерде жұмыс істеу тәжірибесі жергілікті тұрғындардың өз дәрігеріне деген сенімін нығайтты.

Ажардың ауылдық жерге келгені тек оның кәсіби біліктілігін көрсете алғаны ғана емес, сондай-ақ мемлекеттік қолдаудың тиімділігін дәлелдеді. Өйткені, «Дипломмен ауылға» бағдарламасы жас мамандардың ауылдық жерге келуін жеңілдетті, оларға қызметтік үй мен қаржылай көмек ұсынылды, бұл мәселенің шешілуіне маңызды рөл атқарды. Бүгінгі таңда ауылдарға келіп жұмыс істейтін дәрігерлер санының көбеюі, олардың мамандық саласындағы біліктіліктері мен жұмыс жағдайларының жақсаруы, бұл бағдарламаның әсерін толықтай көрсетедіауылдық жерлердегі медицина қызметкерлерінің тапшылығы тек жаңа мамандарды тартумен ғана шешілмейді. Бұл мәселенің түбегейлі шешілуі үшін мемлекетке басқа да маңызды шараларды қолға алу қажет. Мысалы, ауылдық жерлерде жұмыс істейтін дәрігерлердің кәсіби біліктілігін арттыру, жұмыс орындарын жақсарту, сондай-ақ медициналық мекемелердің техникалық жабдықталуын жаңарту керек. Осы тұрғыдан алғанда, ауылдық жерлерде медициналық қызметтің сапасын жақсартудың қосымша қадамдары өте маңызды. Атап айтқанда, ауылды жерлерде жұмыс істейтін дәрігерлердің баспана мәселесін шешу, медициналық орталықтардың материалдық-техникалық базасын нығайту, сондай-ақ аудандық ауруханалар мен емханаларды заманауи құралдармен жабдықтау қажет.

Сонымен қатар, ауылдық жерлерде медициналық қызмет көрсету сапасын арттыру мақсатында жергілікті атқарушы органдар мен денсаулық сақтау министрлігі дәрігерлерді ынталандырудың жаңа тәсілдерін қарастыруы керек. Мысалы, денсаулық сақтау саласына маман ретінде қабылданған жас дәрігерлердің оқуын әрі қарай жалғастыруына жағдай жасау, оларға тұрақты түрде тренингтер мен семинарлар ұйымдастыру, сондай-ақ әртүрлі біліктілік арттыру курстарын өткізу ауыл тұрғындарына сапалы медициналық көмек көрсетуге мүмкіндік береді. Қазіргі таңда облыс орталықтары мен ауылдар арасында медициналық көмек көрсету деңгейінің айырмашылығы әлі де үлкен, сондықтан бұған мемлекет ерекше назар аударуы қажет.

Медициналық кадрлар тапшылығының мәселесін шешу тек дәрігерлердің санын арттырумен ғана шектелмейді. Сонымен қатар, мемлекет тарапынан дәрігерлердің жұмысын қолдау және медициналық мекемелердің инфрақұрылымын дамыту бойынша кешенді шаралар қабылдау қажет. Осы мақсатта елімізде енгізілген жаңа заңдар мен мемлекеттік бағдарламалар, соның ішінде ауылдық жерлерде жұмыс істейтін мамандарға арналған түрлі жеңілдіктер мен әлеуметтік көмектер ауыл тұрғындарының медициналық қызметке қолжетімділігін арттыруға бағытталған. Бұл тұрғыдан алғанда, Қазақстанның әрбір ауылында сапалы медициналық қызмет көрсету үшін жаңа мүмкіндіктер ашылуы тиіс.