Ұлттық спортқа деген қызығушылық бүгінде тек ауыл-аймақпен шектелмей, қала жастары арасында да кең өріс алуда. Көкпар, асық ату, аударыспақ, садақ ату сияқты дәстүрлі ойындармен қатар, арқан тартыс спорты ерекше серпін алып, дамып келеді. Бұл үрдіс Риддер қаласында да айқын сезіледі. Жақында мұнда ұлттық спорт түрлерін дәріптеуге арналған оқу-жаттығу жиыны өтті, деп хабарлайды Altainews.kz тілшісі.

Жиынның басты мақсаты – ұлттық спортты насихаттау, жас спортшылардың шеберлігін шыңдау және олардың бойында ұйымшылдық пен намысшылдықты қалыптастыру болды. Жаттығу барысында көкпар ойыны тартысты түрде ұйымдастырылып, жастар ұлттық рухты сезініп қайтты. Шараның басында жергілікті ақсақалдар ақ батасын беріп, ойынға сәттілік тіледі.

Арқан тартысқа деген ерекше қызығушылық V Дүниежүзілік көшпенділер ойындарынан кейін арта түсті. Аталған халықаралық дода ұлттық ойындарға жаңа серпін беріп, еліміздің түкпір-түкпіріндегі жастарды тарихи мұраға жақындатты. Осыдан кейін Риддерде құрылған арқан тартыс құрамасы қысқа уақыт ішінде өңірлік және республикалық жарыстарда топ жарып, жүлделі орындарға ие болып үлгерді.

Ұлттық спорттың жастар тәрбиесіндегі маңызы туралы Риддер қалалық мәслихатының депутаты Ильгиз Загидуллин де өз пікірін білдірді.

Риддерде ұлттық спорттың тұрақты түрде ұйымдастырылуы – өткен мен бүгінді сабақтастырудың айқын көрінісі. Арқан тартыс секілді қарапайым, бірақ мазмұны терең ойынның қайта жандануы жастардың ұлттық құндылықтарға бет бұрып жатқанын көрсетеді. Алдағы уақытта да бұл бағыттағы жұмыстар жалғасын тауып, спорттың жаңа биіктерге көтерілуі күтілуде.

Жайна Сыранова

фото автордан