Тәуелсіздік күні мерекесіне орай Күршім ауданында бірқатар нысандар пайдалануға берілді. 

Мереке күні ауданда халық үшін пайдалы нысандар ашылып, баспана кілті де табыс етілді, деп хабарлайды Altaynews.kz тілшісі.

Атап айтсақ, Сарыөлең ауылдық округіне қарасты Барақ батыр ауылында шағын футбол алаңы салтанатты түрде ашылды. 

Салауатты өмір салтын сақтауға арналған Street workout қозғалыс құралдары мен шағын футбол алаңдары ауданымыздың бірқатар елді мекендерінде орнатылып, тұрғындардың спортпен тегін шұғылдануына мүмкіндік тудырып отыр. Соның бірі Бірлік ауылындағы воркаут және шағын футбол алаңы Тәуелсіздік күні ашылу салтанаты болып, ауыл тұрғындарына пайдалануға берілді.

Сондай-ақ, Күршім ауылдық округіне қарасты Алғабас ауылында жаңа үйдің құрылысы аяқталып, кілті көпбалалы отбасына табысталды.

«Бір қабатты Шығыс» бағдарламасы әсіресе елді мекендерде тұрғын үй мәселесін шешуге оңтайлы септігін тигізіп жатыр. Үйлер заманауи технологиямен салынған, барлық қажетті инфраструктурамен жабдықталған. Елді мекен тұрғындарын тұрғын үймен қамту бағытындағы жұмыстар жалғасын табуда.