Қызылшамен сырқаттанушылық екпе алмаған адамдар арасында жиі тіркеледі
Фото: inbusiness.kz
ШҚО-да қызылшаның 209 зертханалық расталған жағдайы тіркелді, былтырғы жылдың осы кезеңінде қызылша аурушаңдығы тіркелмеген.
ШҚО санитарлық-эпидемиологиялық бақылау департаментінің ақпараты бойынша, науқастардың негізгі үлесі - 14 жасқа дейінгі балалар (70%), 25%-ын ересектер және 5%-ын жасөспірімдер құрайды, деп хабарлайды Altaynews.kz тілшісі.
Аурушаңдық жағдайлары келесі аумақтарда тіркелген: Глубокое ауданы – 6, Зайсан ауданы - 34, Алтай ауданы - 35, Самар ауданы - 8, Риддер қаласы - 1, Ұлан ауданы - 4, Өскемен қаласы - 120, Шемонаиха - 1.
Сырқаттанушылық негізінен екпе алмаған адамдар арасында және вакцинация туралы мәліметтері жоқ адамдар арасында тіркелген.
Эпидемиологиялық зерттеу нәтижесі көрсеткендей, 13,9% немесе 13 қызылша науқасы Алматы, Атырау, Стамбул қалаларында және Тәжікстан елдерінде ауырып елге әкелгендер.
Қызылшамен сырқаттанушылықтың одан әрі таралуының алдын алу және жағдайды тұрақтандыру мақсатында Бас мемлекеттік санитарлық дәрігерінің қаулысы шығарылды. Қаулыға сәйкес, қызылшаға, қызамыққа және паротитке қарсы 6-11 айлық балаларға, қызылшаның егу мәртебесіне қарамастан 2-4 жастағы балаларға қосымша жаппай иммундауды жүргізу басталды.
Айжанат Бақытқызы