А.Пушкин атындағы облыстық кітапханада Қазақстан Журналистер Одағының мүшесі, әріптесіміз, көп жылдар «Рудный Алтай» газетінде жұмыс істеген, «NEWSKY AWARD 2023» халықаралық БАҚ сыйлығының лауреаты Елена Пашкенің екі кітабының тұсаукесері өтті.

«Жизнь благодарю» поэтикалық жинағы мен «В путь! В путь! В путь!» атты саяхаттардан жазылған очерктер жинағы әдебиетті сүйетін өскемендіктерге Жаңа жыл қарсаңында тамаша тарту болды, деп хабарлайды Altaynews.kz тілшісі.

Интернационалды отбасынан шыққан Елена (әкесі - неміс, анасы - корей) бойына осы этностардың ең жақсы қасиеттерін сіңіріп, оны шығармашылығында қолдана білді.

Автордың аңғал, философиялық, жеңіл әзілмен жазылған, кейде қалыпқа сыймайтын, бірақ әрқашан шытырман оқиғаларға, үміттерге, қуанышқа толы шығармалары оқырманын бейжай қалдырмай, шабыттандырады, кейде алаңдатады, енді бірде қанаттандырып, қуаныш сыйлайды.

Кешке жиналған бұрынғы әріптестері, достары мен баспахана кызметкерлері автордың шығамашылығы жайында жылы лебіздерін білдірді.

Қызықты факт: 2021 жылы Елена Пашкенің өмірбаяны екі энциклопедияға – «Қазақстан Республикасының қоғам қайраткерлері» және «Қазақстан Республикасының танымал корейлері» енген.