ШҚО-да бейімдеу орталығы ашылды
Өскеменнің іргесіндегі Ұлан ауданы Донское ауылында «Кәмелетке толмаған балаларды бейімдеу орталығы» ашылды, деп хабарлайды Altainews.kz тілшісі.
Кәмелетке толмаған балаларды бейімдеу орталығы директорының міндетін атқарушы Алмаш Олжабаеваның айтуынша, облыстық білім басқармасының және «Шығыс Сүт» корпорациясының басшысы Сейілжан Сайлаубаевтың қолдауымен Донское ауылында орналасқан бұрынғы балабақша ғимараты толығымен жөнделіп, қажетті жиһаздармен, оқу құралдарымен жабдықталған.
Орталықта жатын бөлмелер, демалыс бөлмесі, арнайы ойын алаңдары, оқу кабинеті мен спорт залы бар.
35 орындық орталықта 3-18 жас аралығындағы балалар 6 ай тұрады. Қиын жағдайға тап болған балаларға уақытша пана болатын орталық өңіріміздің барлық қалалары мен аудандарынан қабылдайды.
Облыстағы үшінші орталықтың ашылу рәсіміне білім басқармасының басшысы Иннеса Чернышева қатысып, орталық жұмысына сәттілік тіледі.
Мұндағы мамандар әр түрлі себептермен қараусыз және панасыз қалған, ата-анасының қамқорлығынсыз қалған балаларды, арнаулы білім беру ұйымдарына жіберілетін жасөспірімдерді, сондай-ақ қатыгездіктің салдарынан қиын жағдайға тап болған балаларға әлеуметтік-психологиялық көмек көрсетіп, анықталған мәртебесіне қарай баланы отбасына немесе мемлекеттік мекемелерге орналастырады.
Өңірде облыстық білім басқармасына қарасты 2 кәмелетке толмағандарды бейімдеу орталығы жұмыс істейді. Олар Алтай ауданындағы Жаңа Бұқтырма кенті мен Риддер қаласында орналасқан.
Бейімдеу орталығының ашылуы жергілікті ауыл тұрғындарын тұрақты жұмыспен қамтуға да мүмкіндік берді.
Білім басқармасының мәліметі бойынша, соңғы бес жылда бейімдеу орталықтары 865 балаға пана болған. Оның ішінде 646 бала отбасына оралып, 169 бала мемлекеттік мекемелерге орнастырылды, ал 7 бала жақын туыстарының қарауына берілген.
Айжанат Бақытқызы