Жүк тасымалдаушыларға көлік құралын тіркеу үшін жасаған төлемі қайтарылуы мүмкін
pexels.com
Өйткені былтырдан бері N3 санатындағы көлік құралдарын бастапқы тіркеу үшін алым алынбайтын болған.
Бірақ кей жүк тасымалдаушылар бұдан бейхабар болып шықты, деп хабарлайды Altainews.kz тілшісі.
Мәселен, кәсіпкер Шыңғыс Келгенбаев Қазақстан Республикасының Салық кодексіне сәйкес өзінің арнайы көлігін бастапқы ресімдеу үшін 828 мың теңге төлеген.
Алайда Шығыс Қазақстан көлік прокуроры Нұржан Керімбаевтың ақпараты бойынша, шыққанына 7 жылға дейінгі (шығарылған жылын қоса алғанда) N3 (ершікті тартқыштар) санатындағы көлік құралдарын бастапқы тіркеу үшін алымның күшін жою туралы Салық кодексіне енгізілген толықтырулар 2023 жылғы 1 қаңтардан бастап заңды күшіне енді.
ШҚО Кәсіпкерлер палатасы Шығыс Қазақстан көлік прокуратурасымен бірлесіп, заңнаманы түсіндіру бойынша жүк тасымалдаушылармен кездесу өткізді.
Нұржан Керімбаев атап өткендей, қабылданған шараларға қарамастан, жүк тасымалдаушылар бюджетке қомақты соманы төлеуді жалғастыруда.
Бұндай жағдайларға тасымалдаушылардың отандық кәсіпкерлерді қолдау бойынша мемлекет тарапынан қабылданып жатқан шаралар туралы хабардар болмауы себеп.
